وزیراعلٰی پنجاب مریم نواز شریف کی ہدایت کے باوجود محکمہ لوکل گورنمنٹ اینڈ کمیونٹی ڈویلپمنٹ میں تین سال سے زائد مدت ملازمت پر فائز افسران کی تبدیلی عمل میں نہیں لائی گئی، لاہور کی تین تحصیلیں اس سلسلے میں سرفہرست ہیں۔تفصیلات کے مطابق، وزیراعلیٰ مریم نواز کی جانب سے تمام محکموں کو ہدایت کی گئی تھی کہ تین سال سے زائد عرصے سے ایک ہی جگہ تعینات افسران کو فوری تبدیل کیا جائے، تاہم لوکل گورنمنٹ ڈیپارٹمنٹ میں اب تک اس حوالے سے کوئی لسٹ جاری نہیں کی گئی اور نہ ہی تبادلوں کا کوئی سلسلہ شروع کیا گیا ہے۔ذرائع کے مطابق، لاہور اس حوالے سے پہلے نمبر پر ہے جہاں تین تحصیلوں میں افسران کو تین سال سے بھی زیادہ عرصہ بیت چکا ہے۔ ان میں تحصیل ماڈل ٹاؤن میں اسسٹنٹ ڈائریکٹر (اے ڈی ایل جی) انعم چوہدری، تحصیل رائیونڈ میں سید احمد رضا شیرازی اور تحصیل کینٹ میں مبشر سلیم شامل ہیں۔ ان تینوں افسران کی تعیناتی کو تین سال سے زائد کا عرصہ گزر چکا ہے اور وہ ابھی تک اپنے عہدوں پر برقرار ہیں۔مزید یہ کہ لوکل گورنمنٹ ڈیپارٹمنٹ میں ان کے علاوہ بھی متعدد اسسٹنٹ ڈائریکٹرز، ڈپٹی ڈائریکٹرز اور ڈائریکٹرز موجود ہیں جنہیں بھی تبدیل نہیں کیا گیا ہے۔ واضح رہے کہ وزیراعلیٰ کی واضح ہدایت کے باوجود محکمے کی جانب سے اب تک کوئی کارروائی عمل میں نہیں لائی گئی، جس سے افسران میں قیاس آرائیوں پیدا ہو رہی ہیں۔
محکمہ بلدیات پنجاب میں افسران تین سال سے زائد عرصہ سے تعینات،وزیر اعلٰی کے احکامات کی خلاف ورزی
