ضلعی انتظامیہ کی جانب سے ضلع لاہور کی حدود میں محفوظ بسنت کے حوالے سے موٹرسائیکلز پر سیفٹی راڈز لگانے کی مہم کا افتتاح ہوا۔ کمشنر لاہور مریم خان، سی سی پی او لاہور بلال صدیق کمیانہ اور سی ٹی او لاہور ڈاکٹر اطہر وحید نے افتتاح کیا۔ آزادی چوک یادگار روڈ پر راڈ سیفٹی کیمپ قائم کیا گیا اور موٹر سائیکلز پر سیفٹی راڈز لگائے گئے۔ کمشنر لاہور، سی سی پی او لاہور اور سی ٹی او لاہور نے موٹرسائکلز پر سیفٹی راڈز لگانے کا جائزہ لیا۔ اس موقع پر کمشنر لاہور نے میڈیا سے گفتگو کرتے ہوئے کہا کہ شہریوں خصوصا بائیکرز کی سیفٹی اور سکیورٹی کیلئے خصوصی مہم کا آغاز ہے، بسنت کے دنوں میں شہر میں فری رائیڈ سروس فراہم کی جائے گی، تین روزہ بسنت کے دوران سیفٹی راڈ کے بغیر کوئی موٹر سائیکل لاہور کی سڑکوں پر نہیں آئیگی، کائٹ فلائنگ آرڈینینس 2025کے تحت موٹرسائیکل سوار سیفٹی وائرز/راڈز لگانے کے پابند ہیں، محفوظ بسنت کیلئے بائیک پروٹیکشن و بائکر سیفٹی اقدامات اٹھائے جارہے ہیں۔ کمشنر لاہور نے کہا کہ صرف لاہور ضلع کی حدود میں تین روزہ ”محفوظ بسنت“6,7,8 فروری 2026, ہورہی ہے، 6فروری 2026 سے پہلے ضلع لاہور میں پتنگ بازی کی قطعا اجازت نہیں، شہر میں پتنگ و ڈور کی فروخت کی اجازت صرف یکم فروری تا 8 فروری 2026 ہے۔ انہوں نے کہا کہ کائٹ فلائنگ میٹیریل مینوفیکچرنگ کی اجازت بھی صرف ضلع لاہور میں ہے، صرف رجسٹرڈ مینوفیکچررز، ٹریڈرز اور سیلرز کو ہی کاروبار کی اجازت ہوگی، ”محفوظ بسنت“ کی تاریخوں و قوانین کی خلاف ورزی پر سخت کریک ڈاون کی ہدایات دی ہیں۔کمشنر لاہور مریم خان نے شہریوں سے اپیل کرتے ہوئے کہا کہ شہر لاہور میں قائم سیفٹی روڈ کیمپس سے اپنی موٹر سائیکلز پر فری سیفٹی راڈز لگوائیں، شہریوں کے تحفظ کیلئے ہر قدم اٹھائیں گے شہری بھی محفوظ بسنت کیلئے اپنا کلیدی کردار ادا کریں، محفوظ بسنت ثقافتی تہوار کے دوران تمام محکمے ضلعی انتظامیہ و پولیس کے معاون کار ہونگے۔ کمشنر لاہور نے مزید کہا کہ یہ محض مہم نہیں بلکہ شہریوں کی سیفٹی و سکیورٹی کیلئے باقاعدہ عملی قدم ہے۔سی سی پی او لاہور نے کہا کہ بسنت قوانین کی خلاف ورزی پر سخت قانونی کاروائی کی جائے گی، شہری محفوظ بسنت سے محظوظ ہوں مگر شہریوں کی جانوں و حادثات سے تحفظ کیلئے لاہور پولیس کوئی دقیقہ فروگزاشت نہیں کرے گی۔ سی ٹی او لاہور نے کہا کہ شہر میں 100 روڈ سیفٹی کیمپس سے روزانہ 50ہزار تا 60ہزار موٹر سائیکلز پر سیفٹی راڈز لگائے جارہے ہیں، محفوظ بسنت کیلئے روڈ سیفٹی کیمپس سے 10 لاکھ سے زائد سیفٹی راڈز موٹرسائیکلز پر لگائے جائینگے۔
ضلع لاہور کی حدود میں محفوظ بسنت کے حوالے سے موٹرسائیکلز پر مفت سیفٹی راڈز لگانے کی مہم کا افتتاح
