سیکرٹری فوڈ سیفٹی اینڈ کنزیومر پروٹیکشن ڈاکٹر کرن خورشید کی زیر صدارت کنزیومر پروٹیکشن کونسل کا ایک اہم اجلاس منعقد ہوا۔ اجلاس میں ڈی جی انفورسمنٹ عمران قریشی، ایڈیشنل ڈی جی ازوبہ عظیم، ڈپٹی سیکرٹری محمد خالد سمیت دیگر اعلیٰ افسران نے شرکت کی۔ اجلاس کے دوران ڈسٹرکٹ کنزیومر پروٹیکشن کونسلز کی اگست اور ستمبر 2026 کی کارکردگی رپورٹ جاری کی گئی۔ رپورٹ کے مطابق صارفین کی شکایات کے حل کے لیے قائم کونسلز کی کارکردگی مقررہ ہدف سے 115 فیصد زائد رہی۔ سیکرٹری فوڈ سیفٹی اینڈ کنزیومر پروٹیکشن ڈاکٹر کرن خورشید نے بتایا کہ اگست اور ستمبر کے دوران صارفین کی 3,708 شکایات نمٹا دی گئیں، جس سے 2 ماہ میں شکایات کے حل کی شرح 97 فیصد تک پہنچ گئی ہے۔ڈاکٹر کرن خورشید نے مزید بتایا کہ قوانین کی خلاف ورزی پر ستمبر اور اگست میں 21 لاکھ 72 ہزار روپے سے زائد کا جرمانہ عائد کیا گیا، جبکہ صارفین کی شکایات پر مختلف کارروائیوں کے دوران 2,134 وارننگز جاری کی گئیں۔انہوں نے بتایا کہ "کنزیومر پروٹیکٹ ایپ” کے آغاز کے بعد شکایات درج کرانے کے رجحان میں زبردست اضافہ دیکھنے میں آیا ہے۔ آن لائن شکایات میں 46.8 فیصد اضافہ ہوا، اور صرف ستمبر کے مہینے میں 229 آن لائن شکایات موصول ہوئیں۔ ایپ لانچ ہونے کے بعد سے اب تک 12,000 سے زائد نئی شکایات درج کی جا چکی ہیں۔ مجموعی طور پر سال 2026 میں اب تک ریکارڈ 20,255 شکایات موصول ہوئیں جن میں سے 18,566 کا کامیابی سے ازالہ کیا جا چکا ہے۔ ضلعی بنیادوں پر کارکردگی کا جائزہ لیتے ہوئے انہوں نے بتایا کہ اضلاع کی بنیاد پر شکایات نمٹانے میں قصور، گجرات، سرگودھا اور جہلم سرِ فہرست رہے۔ قصور ڈسٹرکٹ میں 2 ماہ کی مدت میں 118 شکایات جبکہ گجرات کونسل نے اگست اور ستمبر میں 134 شکایات کا ازالہ کیا۔سیکرٹری فوڈ سیفٹی اینڈ کنزیومر پروٹیکشن نے کہا کہ صارفین کے حقوق کا تحفظ کنزیومر پروٹیکشن کونسل کی اولین ترجیح ہے اور اس سلسلے میں تمام ممکنہ وسائل و اقدامات بروئے کار لائے جاتے رہیں گے۔
