معاون خصوصی وزیراعلیٰ پنجاب برائے فوڈ سیفٹی سلمیٰ بٹ کی زیر صدارت پنجاب ایگریکلچر مارکیٹنگ ریگولیٹری اتھارٹی (PAMRA) کا اہم اجلاس منعقد ہوا۔ اجلاس میں سیکرٹری فوڈ سیفٹی ڈاکٹر کرن خورشید، ڈی جی پامرا PAMRA ذیشان نصر اللہ، ڈپٹی سیکرٹری محمد خالد سمیت دیگر اعلیٰ افسران نے شرکت کی۔اجلاس میں پنجاب کی مارکیٹ کمیٹیوں کی کارکردگی جانچنے کیلئے اسکورنگ میتھڈولوجی کے تحت 100 نمبرز پر مشتمل فارمولا جاری کرنے کا فیصلہ کیا گیا۔ نئے اسکورنگ نظام کے تحت مارکیٹ کمیٹیوں کی کارکردگی کو مختلف پیمانوں پر جانچا جائے گا۔اسکورنگ میں آمدن کے 45، زرعی انڈسٹری کے 20، اثاثوں کے 15 اور تھرو پٹ کے 15 نمبرز شامل ہوں گے۔ 60 یا اس سے زائد اسکور حاصل کرنے والی مارکیٹ کمیٹیوں کو کیٹیگری ’’اے‘‘ جبکہ 60 سے کم اسکور حاصل کرنے والی کمیٹیوں کو کیٹیگری ’’بی‘‘ میں شمار کیا جائے گا۔اجلاس کے دوران قصور فروٹ اینڈ سبزی منڈی کے ترقیاتی منصوبے پر بھی پیش رفت کا جائزہ لیا گیا۔ قصور منڈی اور پاک سٹی ہاؤسنگ اسکیم کی زمین کی حدود سے متعلق تنازع کا باقاعدہ حل نکال لیا گیا ہے۔ڈی جی PAMRA اور ریونیو ٹیموں کے مشترکہ دوروں کے بعد اراضی کے ریکارڈ کی تصدیق مکمل کر لی گئی، جبکہ قصور انتظامیہ اور پنجاب لینڈ ریکارڈ اتھارٹی (PLRA) کے تعاون سے حد بندی کی تفصیلی رپورٹ بھی تیار کر لی گئی ہے۔تنازع حل ہونے کے بعد قصور فروٹ و سبزی منڈی کی سائٹ پر ترقیاتی کاموں کا آغاز کر دیا گیا ہے۔ معاون خصوصی سلمیٰ بٹ نے کہا کہ مارکیٹوں کی بہتری، شفاف نظام اور بہتر سہولیات کی فراہمی کیلئے عملی اقدامات کیےجارہے ہیں۔اجلاس میں بتایا گیا کہ قصور منڈی کے تجارتی رقبے کیلئے کل تخمینہ ساڑھے 3 ارب روپے سے زائد لگایا گیا ہے، جس سے منڈی کی ترقی اور جدید سہولیات کی فراہمی کے منصوبے کی تکمیلِ ممکن ہو گی-
پنجاب کی مارکیٹ کمیٹیوں کی کارکردگی جانچنے کیلئے 100 نمبرز کا اسکورنگ فارمولا جاری
