وزیر اعلٰی پنجاب کی خصوصی ہدایت پر کمشنر لاہور زید بن مقصود کے مرکزی امام بارگاہوں کے دورے اور منتظمین سے ملاقات کا سلسلہ جاری ہے۔ کمشنر لاہور زید بن مقصود نے امام بارگاہ ابوالفضل العباس مغلپورہ اور امام بارگاہ پنجتن پاک غازی آباد کا دورہ کیا۔ کمشنر لاہور نے غازی آباد و مغلپورہ میں امام بارگاہوں کے جلوس روٹس کا دورہ کیا۔ اس موقع پر اے سی شالامار و پولیس افسران نے امام بارگاہ پنجتن پاک غازی آباد و مغلپورہ میں انتظامات پر بریفنگ دی۔انتظامیہ اور متعلقہ محکموں نے بریفنگ دیتے ہوئے کہا کہ مرکزی مانیٹرنگ، ریسکیو، میڈیکل کور، لائٹنگ، عارضی پبلک ٹوائیلٹس و دیگر میونپسل انتظامات مکمل ہیں، انتظامیہ امام بارگاہوں کے منتظمین و لائسنس ہولڈرز سے مکمل رابطہ میں ہیں۔ کمشنر لاہور نے امام بارگاہوں کے منتظمین و لائسنس ہولڈرز سے ملاقات کی۔ مرکزی امام بارگاہوں کے منتظمین و لائسنس ہولڈرز نے ضلعی انتظامیہ کی جانب سے کیے گئے انتظامات پر اطمینان کا اظہار کیا ہے۔کمشنر لاہور نے کہا ہے کہ وزیراعلی پنجاب کی ہدایات پر محرم انتظامات کی احسن ترین انداز میں تکمیل کو یقینی بنایا جارہا ہے، حکومتی ہدایات اور ایس او پی ز کیمطابق مرکزی امام بارگاہوں و جلوسوں کے روٹس کی تمام ضروریات اور انتظامات کو یقینی بنایا جا رہا ہے جبکہ روزانہ کی بنیاد پر جائزہ بھی لیا جارہا ہے۔ کمشنر لاہور نے کہا کہ انتظامیہ کا منتظمین و لائسنس ہولڈرز سے مکمل رابطہ ہے، مجالس و جلوس میں اوقات کی پابندی پر عملدرآمد یقینی بنائیں، انہوں نے مزید کہا کہ واسا اور کارپوریشنز کی موبائل ٹیمیں نکاسیئ آب آپریشن کیلئے تمام مرکزی جگہوں پر موجود رہیں۔
