وزیراعلیٰ سندھ مراد علی شاہ نے غٖربت میں کمی پروگرام کے تحت طلبہ اور پروفیشنلز کےلیے آئی ٹی کے نو شعبوں میں سرٹیفکیٹ پروگرام شروع کی خاطر پچاس کروڑ روپے کی منظوری دے دی ہے۔
وزیراعلیٰ نے کہا کہ پروگرام کے تحت سرٹفیکیٹ ہولڈرز کو انڈسٹری کی ضروریات کے مطابق عملی تربیت دی جائےگی۔ مفاہمت کی یادداشت پر دستخط کے اجلاس میں چیف سیکرٹری آصف حیدر شاہ، چیئرمین ایچ ای سی پروفیسر طارق رفیع ، وزیراعلیٰ کے سیکریٹری رحیم شیخ، سیکریٹری اطلاعات، سائنس و ٹیکنالوجی نور احمد سموں، سیکریٹری جامعات و بورڈز عباس بلوچ، وی سی این ای ڈی یونیورسٹی ڈاکٹر سریش لودھی، وی آسی ئی بی اے سکھر ڈاکٹر آصف شیخ، وی سی مہران یونیورسٹی پروفیسر طحہ حسین، ممبر محکمہ آئی ٹی ایاز عقیلی اور دیگر نے شرکت کی ۔
سیکریٹری آئی ٹی نور سموں نے وزیراعلیٰ سندھ کو بریفنگ دی کہ کراچی اور تھرپار ڈویژن کےلیے آئی ٹی کورسز این ای ڈی یونیورسٹی کرائے گی۔ مہران یونیورسٹی حیدرآباد ، میرپور خاص ڈویژن اور شہید بےنظیرآباد جبکہ آئی بی اے سکھر اور لاڑکانہ ڈویژن کےلیے کورسز کرائے گی۔ 
ابتدائی طور پر پروگرام دس ہزار نوجوانوں کی تربیت کےلیے شروع کیا جا رہا ہے۔ وزیراعلیٰ مراد علی شاہ نے پروگرام کےلیے سندھ آئی ٹی ڈیپارٹمنٹ کو پچاس کروڑ روپے جاری کردیے۔ وزیراعلیٰ سندھ کو بتایا گیا کہ کورسز میں جاوا، پیتھون، ڈیٹابیس ایڈمنسٹریٹر، گرافک ڈیزائنر، ای کامرس ، ڈیجیٹل مارکیٹنگ، ویب ڈیولپر، موبائل اپلی کیشن ڈیولپر اور ڈیٹا سائنس سرٹیفکیٹ شامل ہیں۔
ایک سوال کے جواب میں سیکریٹری آئی ٹی نور احمد سموں نے بتایا کہ کورسز کی مدت دو ماہ ہوگی، ہفتے میں پانچ روز یعنی پیر تا جمعہ کلاسز ہوں گی اور ہر ایک گروپ تین سے پینتیس شرکا پر مشتمل ہوگا۔ پروگرام دو مرحلوں پر مشتمل ہوگا۔ پہلے مرحلے میں آئی ٹی سرٹیفکیشن، دوسررے مرحلے میں زیادہ ہوشیار طلبہ کو مراعات دی جائیں گی۔ تمام شرکا کو سرٹفیکٹ سنٹرز پر روبرو دیے جائیں گے ۔
اجلاس کے اختتام پر آئی ٹی سیکریٹری سندھ ، این ای ڈی یونیورسٹی کراچی، آئی بی اے سکھر اور مہران یونیورسٹی جامشورو کے درمیان مفاہمت کی یادداشت پر دستخط کیے گئے۔
