صوبائی وزیرِ تعلیم گلگت بلتستان امان علی عامر کی حوالدار لالک جان شہید نشانِ حیدر کے مزار پر حاضری

صوبائی وزیرِ تعلیم گلگت بلتستان امان علی عامر نے اپنی شاندار انتخابی کامیابی کے بعد یاسین ہندر میں کارگل کے عظیم ہیرو حوالدار لالک جان شہید نشانِ حیدر کے مزارِ اقدس پر حاضری دی فاتحہ خوانی کی اور شہید کو خراجِ عقیدت پیش کیا۔اس موقع پر صوبائی وزیرِ تعلیم امان علی عامر نے حوالدار لالک جان شہید سمیت وطنِ عزیز کے تمام شہداء کی لازوال قربانیوں، بے مثال بہادری، جرأت اور حب الوطنی کو سلام پیش کیا۔ انہوں نے کہا کہ شہداء نے وطن کے دفاع اور سربلندی کے لیے اپنی جانوں کا نذرانہ پیش کرکے تاریخ میں لازوال باب رقم کیا ہے، اور ان کی عظیم قربانیاں ہمیشہ پوری قوم کے لیے مشعلِ راہ رہیں گی۔امان علی عامر نے کہا کہ حوالدار لالک جان شہید نشانِ حیدر گلگت بلتستان کے لیے ہی نہیں بلکہ پوری قوم کے لیے باعثِ فخر ہیں۔ ان کی بہادری، شجاعت اور وطن سے بے مثال محبت نوجوان نسل کے لیے ایک روشن مثال ہے۔ قوم اپنے عظیم شہداء کی قربانیوں کو کبھی فراموش نہیں کرے گی۔اس موقع پر علاقے کے معززین اور عوام کی بڑی تعداد بھی موجود تھی۔ صوبائی وزیرِ تعلیم نے شہداء کے درجات کی بلندی، اہلِ خانہ کے لیے صبر و استقامت اور ملک و قوم کی سلامتی، ترقی و خوشحالی کے لیے خصوصی دعا بھی کی۔انہوں نے اس موقع پر کہا کہ شہداء کی قربانیاں ہمارا فخر، ہماری پہچان اور ہماری آزادی کی بنیاد ہیں۔