ڈپٹی کمشنر لاہور سید موسیٰ رضا کی قیادت میں ضلعی انتظامیہ نے شہر کو صاف ستھرا بنانے کے مشن کو اپنی اولین ترجیح قرار دیتے ہوئے مختلف علاقوں کے دوروں کا سلسلہ شروع کیا ہے۔ حال ہی میں تحصیل واہگہ کے دورے کے دوران ڈی سی لاہور نے جلو موڑ، اتوکی اعوان، جی ٹی روڈ، گوپال سنگھ والا اور اطراف میں صفائی کی صورتحال کا جائزہ لیا۔ چیف آفیسر ایم سی ایل، ایڈیشنل ڈپٹی کمشنر جنرل، اسسٹنٹ کمشنر واہگہ محمد عامر بٹ اور دیگر حکام کی موجودگی میں کیے گئے اس دورے کے دوران انتظامی خلاء اور صفائی کی ناقص صورتحال پر شدید برہمی کا اظہار کیا گیا۔ انتظامیہ نے واضح کیا کہ کلین لاہور مشن کی کامیابی کے لیے ہر سطح پر مسلسل کوششیں جاری ہیں اور ناقص صفائی اور تجاوزات کے خلاف زیرو ٹالرینس پالیسی اپنائی جا رہی ہے۔ ڈپٹی کمشنر لاہور نے ایل ڈبلیو ایم سی کو ہدایت دی کہ صفائی کا نظام بہتر بنایا جائے اور شہر بھر میں موثر صفائی یقینی بنائی جائے۔ معمولات زندگی کے آغاز سے قبل صفائی کے انتظامات مکمل کرنے کی ہدایت دیتے ہوئے کہا گیا کہ گھر گھر سے کوڑا اٹھانے کا عمل روزانہ کی بنیاد پر جاری رکھا جائے۔ واسا کو سیوریج اور نکاسی آب کے مسائل کا فوری حل کرنے کی ہدایت دی گئی جبکہ شہر سے بینرز، پوسٹرز اور ہر قسم کی وال چاکنگ کا فوری خاتمہ کرنے کا حکم دیا گیا۔ ڈپٹی کمشنر لاہور نے واضح کیا کہ اپنے فرائض میں غفلت برتنے والے افسران اور اہلکاروں کے ساتھ کوئی رعایت نہیں ہوگی اور احتساب کا عمل جاری رہے گا۔
