باچا خان انٹرنیشنل ایئرپورٹ پر پشاور سے کوئٹہ کے لئے ساؤتھ ایئر کی فضائی سروس کے آغاز کی افتتاحی تقریب

باچا خان انٹرنیشنل ایئرپورٹ پر پشاور سے کوئٹہ کے لئے ساؤتھ ایئر کی فضائی سروس کے آغاز کی افتتاحی تقریب منعقد ہوئی، جس میں گورنر خیبرپختونخوا فیصل کریم کنڈی نے بطور مہمان خصوصی شرکت کی۔ تقریب میں ساؤتھ ائیر کی چیف ایگزیکٹو آفیسر نشاط فاطمہ، وزیراعلیٰ کے معاون خصوصی برائے ٹرانسپورٹ و ماس ٹرانزٹ سمیع اللہ خان، پاکستان پیپلز پارٹی کے صوبائی صدر محمد علی شاہ باچا،انجمن ہلال احمر خیبرپختونخوا کے چئیرمین فرزند وزیر اور سرحد چیمبر آف کامرس اینڈ انڈسٹری کے صدر جنید الطاف نے بھی شرکت کی. گورنر نے اس موقع پر کیک بھی کاٹا. تقریب سے خطاب کرتے ہوئے گورنر فیصل کریم کنڈی نے ساؤتھ ایئر انتظامیہ کا شکریہ ادا کیا اور کہا کہ پشاور سے کوئٹہ کے لیے فضائی سروس کا آغاز خوش آئند اقدام ہے۔ انہوں نے کہا کہ ساؤتھ ایئر جلد چترال، ڈی آئی خان اور لاہور کے لیے بھی فضائی سروس شروع کرے گی۔گورنر نے کہا کہ ساؤتھ ایئر کی فضائی سروس ملکی معیشت اور خیبرپختونخوا میں سفری رابطوں کے فروغ کے لیے اہم اقدام ہے، اس سے عوام کو بہتر سفری سہولیات میسر آئیں گی جبکہ فضائی رابطوں میں اضافہ صوبے کی معاشی اور تجارتی سرگرمیوں کے فروغ میں بھی معاون ثابت ہوگا۔انہوں نے کہا کہ خیبرپختونخوا کی ترقی کے لیے ہر ممکن کردار ادا کریں گے۔ ساؤتھ ایئر کی ٹیم صوبے میں فضائی رابطوں کے فروغ کے لیے بھرپور کوششیں کر رہی ہے. گورنر نے اس موقع پر پشاور سے کوئٹہ کیلئے سروس شروع کرنے پر ساؤتھ ایئر کیلئے نیک خواہشات کا اظہار کیا۔