ڈپٹی کمشنر لاہور سید موسیٰ رضا کی دوراندیش حکمت عملی کے تحت ضلعی انتظامیہ نے شہر کی تاریخی اور تعمیراتی خوبصورتی کو بحال کرنے کے لیے یونیفارم بلڈنگ پلان کے نفاذ میں نمایاں پیش قدمی کی ہے۔ ڈپٹی کمشنر نے حال ہی میں چیئرنگ کراس سے ہال روڈ تک کا تفصیلی دورہ کیا اور یونیفارم بلڈنگ پلان پر عملدرآمد کا جائزہ لیا۔ اس اہم دورے میں چیف آفیسر ایم سی ایل، ڈپٹی چیف آفیسر ایم سی ایل، اسسٹنٹ کمشنر سٹی اور دیگر متعلقہ حکام بھی ڈپٹی کمشنر کے ہمراہ تھے۔ ڈپٹی چیف آفیسر ایم سی ایل نے ڈپٹی کمشنر کو یونیفائیڈ بلڈنگ ڈیزائن کی موجودہ صورتحال پر تفصیلی بریفنگ فراہم کی۔ ڈپٹی کمشنر سید موسیٰ رضا نے دورے کے دوران واضح ہدایات جاری کیں کہ تمام عمارتوں کے ڈیزائن میں مکمل یکسانیت لائی جائے۔ خلاف ورزی کرنے والے مالکان کو عمارتوں کے ڈیزائن درست کرنے کے لیے نوٹسز جاری کیے جا رہے ہیں۔ ڈپٹی کمشنر نے مزید ہدایات دیں کہ سڑکوں پر جہاں بھی ٹوٹ پھوٹ موجود ہے وہاں فوری طور پر پیچ ورک مکمل کیا جائے۔ انہوں نے یہ بھی یقینی بنانے کی ہدایت دی کہ صفائی کے تمام انتظامات معمولاتِ زندگی کے آغاز سے قبل مکمل کر لیے جائیں۔ علاقے میں سیوریج اور نکاسی آب کے نظام کو فوری بہتر بنانے کی ہدایت بھی جاری کی گئی۔ ڈپٹی کمشنر سید موسیٰ رضا نے اس موقع پر کہا کہ "شہر کی تاریخی اور تعمیراتی خوبصورتی کو بحال کرنا ہمارا بنیادی مشن ہے۔” انہوں نے مزید واضح کیا کہ "بلڈنگ بائی لاز پر عملدرآمد میں کوئی رعایت نہیں برتی جائے گی اور عمارتوں کے ڈیزائن میں یکسانیت شہر کی خوبصورتی اور نظم و ضبط کی واضح عکاسی ہے۔” ڈپٹی کمشنر نے تاجر برادری سے اپیل کی کہ شہر کی خوبصورتی کے لیے ان کا تعاون انتہائی اہم اور ضروری ہے۔یہ منظم اقدامات لاہور شہر کو اس کی اصل تعمیراتی شان اور خوبصورتی واپس دلانے کی سمت میں ایک اہم پیش قدمی ہے۔
یونیفارم بلڈنگ پلان کا سخت نفاذ،چیئرنگ کراس سے ہال روڈ تک تمام عمارتوں میں ڈیزائن کی یکسانیت لائی جائے گی،سید موسٰی رضا
