"محفوظ بسنت” شہریوں کے تحفظ کے لئے موٹرسائیکلز پر سیفٹی راڈز لگانے کی مہم عروج پر۔ لاہور ٹاون ہال میں سیفٹی کیمپس سے موٹر سائیکلز پر سیفٹی راڈز لگائے جارہے ہیں۔ کمشنر لاہور مریم خان، سی سی پی او لاہور بلال صدیق کمیانہ، ڈی سی لاہور کیپٹن ر علی اعجاز اور سی ٹی او لاہور ڈاکٹر اطہر وحید نے مہم میں حصہ لیا اور موٹرسائکلز پر سیفٹی راڈز لگانے کا جائزہ لیا۔اس موقع پر کمشنر لاہور مریم خان نے گفتگو کرتے ہوئے کہا کہ شہریوں خصوصا بائیکرز کی سیفٹی اور سکیورٹی کیلئے خصوصی مہم چلائی جارہی ہے، پورے شہر میں ٹاون ہال سمیت 100 سیفٹی کیمپس سے محفوظ بسنت مہم سلسلے میں موٹرسائیکلز پر فری سیفٹی وائرز نصب لگائے جارہے ہیں۔ انہوں نے کہا کہ تین روزہ بسنت کے دوران سیفٹی کے بغیر کوئی موٹر سائیکل لاہورکی سڑکوں پر نہیں آئیگی، کائٹ فلائنگ آرڈینینس 2025کے تحت موٹرسائیکل سوار سیفٹی وائرز/راڈز لگانے کے پابند ہیں۔کمشنر لاہور نے کہا کہ صرف لاہور ضلع کی حدود میں تین روزہ ”محفوظ بسنت“6,7,8 فروری 2026, ہورہی ہے، 6فروری 2026سے پہلے ضلع لاہور میں پتنگ بازی کی قطعا اجازت نہیں، شہر میں پتنگ و ڈور کی فروخت کی اجازت صرف یکم فروری تا 8 فروری 2026 ہے۔ کمشنر لاہور نے کہا کہ کائٹ فلائنگ میٹیریل مینوفیکچرنگ کی اجازت بھی صرف ضلع لاہور میں ہے اور صرف رجسٹرڈ مینوفیکچررز، ٹریڈرز اور سیلرز کو ہی کاروبار کی اجازت ہوگی۔ کمشنر لاہور نے ”محفوظ بسنت“ کی تاریخوں و قوانین کی خلاف ورزی پر سخت کریک ڈاون کی ہدایات دی ہیں، وزیراعلی پنجاب کی ہدایت پر ضلعی انتظامیہ و پولیس انتظامیہ فیلڈ میں متحرک ہیں، محفوظ بسنت ثقافتی تہوار کے دوران تمام محکمے ضلعی انتظامیہ و پولیس کے معاون کار ہونگے۔کمشنر لاہور مریم خان نے شہریوں سے اپیل کی ہے کہ ضلعی انتظامیہ محفوظ بسنت کیلئے بائیک پروٹیکشن و بائیکر سیفٹی اقدامات اٹھائے جارہے ہیں، شہری موٹر سائیکز پر سیفٹی راڈز ضرور لگائیں، بسنت کے دنوں میں شہر میں فری رائیڈ سروس بھی فراہم کی جارہی ہے، شہریوں کے تحفظ کیلئے ہر قدم اٹھائیں گے، شہری بھی محفوظ بسنت کیلئے اپنا کلیدی کردار ادا کریں، ڈی سی لاہور نے بھی شہریوں سے اپیل کی ہے کہ شہر لاہور میں قائم سیفٹی راڈز کیمپس سے اپنی موٹر سائیکلز پر فری سیفٹی راڈز لگوائیں۔اس موقع پر سی سی پی او لاہور اور سی ٹی او لاہور نے کہا کہ لاہور شہر میں 100 روڈ سیفٹی کیمپس سے روزانہ 50ہزار تا 60ہزار موٹر سائیکلز پر سیفٹی راڈز لگائے جارہے ہیں، قانون کی خلاف ورزی پر پولیس سخت ایکشن لے گی اور زیروٹالرنس ہوگی، محفوظ بسنت کیلئے گورنمنٹ کیجانب سے 10 لاکھ سے زائد سیفٹی راڈز موٹرسائیکلز پر لگائے جائینگے۔
*ٹاون ہال لاہور۔ "محفوظ بسنت” شہریوں کے تحفظ کے لیے موٹرسائیکلز پر سیفٹی راڈز لگانے کی مہم عروج پر۔*
