بسنت،شہریوں کی قیمتی جانوں کا تحفظ ہماری اولین ترجیح اور ذمہ داری ہے، ڈی سی لاہور

وزیراعلیٰ پنجاب کے ویژن کے عین مطابق محفوظ بسنت کے انعقاد کو یقینی بنانے کے لیے ڈپٹی کمشنر لاہور کیپٹن (ر) محمد علی اعجاز کی قیادت میں ضلعی انتظامیہ لاہور نے جامع اقدامات کا آغاز کر دیا ہے جس کے تحت پورے شہر کو بسنت تھیم سے سجانے کے ساتھ ساتھ حفاظتی مہم کو مزید سخت کر دیا گیا ہے۔ ڈی سی لاہور کی خصوصی ہدایت پر ضلعی افسران نے ضلع بھر میں عمارتوں اور گھروں کی چھتوں کی انسپیکشن کا عمل شروع کر دیا ہے، جس کے دوران خطرناک اور مخدوش چھتوں کی نشاندہی کر کے وہاں فوری طور پر نوٹسز چسپاں کیے جا رہے ہیں تاکہ کسی بھی ممکنہ حادثے سے بچا جا سکے۔ اس مہم کی سخت مانیٹرنگ کی جا رہی ہے اور تمام افسران کو حکم دیا گیا ہے کہ وہ مخدوش عمارتوں کے مکینوں سے ذاتی طور پر ملاقات کر کے انہیں خطرات سے آگاہ کریں اور عوامی مقامات پر قائم خصوصی کیمپس کے ذریعے شہریوں کو بسنت کے حوالے سے حفاظتی تدابیر سمجھائیں۔ ضلعی انتظامیہ لاہور نہ صرف انتظامی سطح پر متحرک ہے بلکہ عوامی سطح پر آگاہی کے لیے گھر گھر جا کر محفوظ جشن کا پیغام پہنچا رہی ہے، جبکہ موٹر سائیکل سواروں کی جانوں کے تحفظ کے لیے سیفٹی وائرز اور حفاظتی راڈز کی تنصیب کو بھی یقینی بنایا جا رہا ہے۔ ڈپٹی کمشنر لاہور کیپٹن (ر) محمد علی اعجاز نے اس عزم کا اظہار کیا ہے کہ شہریوں کی قیمتی جانوں کا تحفظ اولین ترجیح ہے اور اس ثقافتی میلے کو پرامن اور خوشگوار ماحول میں منعقد کرنے کے لیے والدین اور بزرگوں کو بھی بچوں کی حفاظت کے لیے متحرک کیا جا رہا ہے۔ ضلعی انتظامیہ لاہور کی ان بروقت کوششوں اور فیلڈ مانیٹرنگ کی بدولت شہر میں بسنت کی سجاوٹ کے ساتھ ساتھ عوامی تحفظ کے پیغامات کو بھی نمایاں کیا گیا ہے تاکہ ایک محفوظ اور منظم طریقے سے اس ایونٹ کو کامیاب بنایا جا سکے۔