وزیر بلدیات ذیشان رفیق نے کہا ہے کہ پنجاب بھر میں (7 جون) سے قربانی سیل پوائنٹس کو فنکشنل کر رہے ہیں۔ عوام کو ریلیف دینے کے لئے سیل پوائنٹس بغیر نفع نقصان کے اصول کے تحت چلیں گے۔ وزیراعلی کے معاون خصوصی برائے سیاسی امور ذیشان عاشق ملک کے ساتھ فیصل آباد کے دورے میں کمشنر آفس میں ضلعی افسروں اور عوامی نمائندوں کے اجلاس کی صدارت کرتے ہوئے انہوں نے کہا کہ عیدالاضحٰی پر صفائی کے موثر انتظامات کے لئے 13 روز کے لئے میونسپل سٹاف کی چھٹیوں پر پابندی لگا دی گئی ہے۔ یہ پابندی عید سے 10 روز پہلے اور تین روز بعد تک ہوگی۔
کمشنر آفس میں اجلاس کے دوران ستھرا پنجاب پروگرام اور عید صفائی پلان کا تفصیلی جائزہ لیا گیا۔ کمشنر فیصل آباد میڈم سلوت سعید، ڈپٹی کمشنر عبداللہ نیئر شیخ اور میونسپل اداروں کے چیف آفیسرز نے بریفنگ دی۔
صوبائی وزیر بلدیات ذیشان رفیق نے اجلاس سے خطاب کرتے ہوئے کہا کہ ستھرا پنجاب پروگرام کا ہدف یومیہ 57 ہزار ٹن کوڑا تیز رفتاری سے تلف کرنا ہے۔ دنیا کے جدید ممالک کہ طرح پنجاب میں بھی صفائی کا دیرپا نظام رائج کرنا چاہتے ہیں۔ اس کے لئے آئوٹ سورسنگ ماڈل متعارف کرایا جا رہا ہے۔ انہوں نے کہا کہ صفائی کے معیاری نظام کے لئے آئوٹ سورسنگ کی پری کوالیفیکیشن کا عمل مکمل ہوچکا ہے۔ ذیشان رفیق نے کہا کہ پہلی بار شہری و دیہی علاقوں میں صفائی کا یکساں نظام متعارف کرا رہے ہیں۔ آج سے پہلے دیہات تک کبھی میونسپل سروسز نہیں پہنچیں حالانکہ آبادی کی اکثریت دیہات میں رہتی ہے۔ انہوں نے کہا کہ وزیراعلی مریم نواز شریف کی کاوشوں سے دیہی علاقوں کو بھی فوکس کر رہے ہیں۔ صفائی کا پروگرام آئوٹ سورس ہونے پر کنٹریکٹرز کو دستیاب ہیومین ریسورس سپرد کریں گے تاہم انہوں نے واضح کیا کہ ہر کنٹریکٹر کی کارکردگی کو حکومت پنجاب خود مانیٹر کرے گی۔ صفائی کی سہولیات پر سمجھوتہ نہیں کیا جائے گا۔ وزیر بلدیات نے بتایا کہ پروگرام کے مطابق ہر 250 گھرانوں کے لئے ایک سینٹری ورکر مخصوص ہوگا۔ علاوہ ازیں پنجاب بھر میں پانچ جدید نئی لینڈ فل سائٹس قائم کی جا رہی ہیں۔ ضلع فیصل آباد میں بھی ایک لینڈ فل سائٹ بنائی جائے گی۔ ذیشان رفیق نے کہا کہ آئوٹ سورسنگ کے ممکنہ چینلجز سے نمٹنے کی بھی تیاری کی جا رہی ہے۔ کوڑا اٹھانے اور گلی محلوں کی صفائی کے لئے معمولی فیس لاگو کی جائے گی۔ صفائی کے موثر نظام کے لئے شہری اور دیہی علاقوں میں مانیٹرنگ کمیٹیز قائم ہونگی۔ انہوں نے خبردار کیا کہ وزیراعلی مریم نواز شریف نے عیدالاضحٰی پر شہروں میں زیرو ویسٹ کا حکم دیا ہے۔ اس حوالے سے سستی کی گنجائش نہیں۔ انہوں نے ضلعی افسروں کو صفائی پلان متعلقہ ارکان اسمبلی، ٹکٹ ہولڈرز اور میڈیا سے بھی شیئر کرنے کی ہدایت کی۔ صوبائی وزیر نے کمشنر فیصل آباد سلوت سعید کی سربراہی میں ڈویژن بھر میں ستھرا پنجاب کے پہلے مرحلے کے اچھے نتائج کی تعریف بھی کی۔ اس موقع پر معاون خصوصی وزیراعلی ذیشان ملک نے ستھرا پنجاب پروگرام اور عید پلان کے حوالے سے ہدایات جاری کرتے ہوئے کہا کہ مسلم لیگ ن کے ٹکٹ ہولڈرز بھیبحکومتی ٹیم کا اہم حصہ ہیں۔ عوامی خدمت کے عمل میں انہیں ساتھ لے کر چلیں گے۔ ذیشان ملک نے یہ بھی کہا کہ تعمیر و ترقی اور عوامی بہبود کے اقدامات میں عوامی نمائندوں کا تعاون ضروری ہے۔ 
کمشنر فیصل آباد سلوت سعید نے صوبائی وزیر اور معاون خصوصی کو بریفنگ دیتے ہوئے کہا کہ وزیراعلی مریم نواز شریف کے ویژن کے مطابق اہداف کی تکمیل کے لئے کمربستہ ہیں۔ ستھرا پنجاب پروگرام کے پہلے مرحلے میں فیصل آباد ڈویژن ٹاپ ڈویژنز میں تھا۔ آئوٹ سورسنگ کے بعد بھی اپنی ذمہ داریاں احسن انداز میں انجام دیں گے۔
