وزیر اعلیٰ خیبر پختونخوا محمد سہیل آفریدی کی زیر صدارت پبلک سروس کمیشن سے متعلق اجلاس منعقد ہوا۔وزیراعلٰی نے متعلقہ حکام کو جنوری 2026 میں پراونشل منیجمنٹ سروس کی نئی آسامیوں کا اعلان یقینی بنانے کی ہدایت کی۔انہوں نے کہا کہ پی ایم ایس کی آسامیاں مشتہر کرنے کے لیے ابھی سے ہوم ورک شروع کیا جائے۔وزیراعلیٰ نے پبلک سروس کمیشن کے تحت امتحانات سمیت تمام امور کی ڈیجیٹائزیشن کی بھی ہدایت کی۔وزیر اعلٰی نے کہا کہ صوبائی حکومت عمران خان کے وژن کے مطابق میرٹ، شفافیت اور ڈیجیٹل گورننس کے فروغ کے لیے اصلاحات پر عمل کر رہی ہے، ڈیجیٹائزیشن سے کارکردگی اور شفافیت دونوں یقینی بنائی جائیں گی۔ ہم غیر ضروری انسانی مداخلت اور سفارشی کلچر ختم کرنے کے لیے تمام امور ڈیجیٹائز کر رہے ہیں، عوام کی سہولت کے لیے حکومت پبلک سروس کمیشن کی ضرویات ترجیحی بنیادوں پر پوری کرے گی، پبلک سروس کمیشن کو مزید مضبوط اور مؤثر ادارہ بنانے کے لیے سرمایہ کاری میں اضافہ کیا جائے گا۔وزیراعلیٰ نے پبلک سروس کمیشن کے تحت بھرتیوں کا عمل بھی تیز کرنے کی ہدایت بھی کی۔محمد سہیل آفریدی نے کہا کہ بھرتیوں کا عمل تیز اور میرٹ پر مبنی بنانے کے لیے آؤٹ آف باکس پالیسی اپنائی جائے۔اجلاس میں کابینہ اراکین مینا خان آفریدی ، آفتاب عالم، مزمل اسلم متعلقہ انتظامی سیکرٹریز اور چیئرمین پبلک سروس کمیشن نے شرکت کی۔
