وزیر اعلیٰ خیبر پختونخوا محمد سہیل آفریدی کا فرنٹئیر ویمن کالج میں ”انصاف فیمیل ایجوکیشن کارڈ“ کے اجرا کی تقریب سے خطاب، وزیر اعلیٰ محمد سہیل آفریدی نے صوبے کی طالبات اور یتیم بچوں کے لیے مفت اعلیٰ تعلیم کے تاریخی منصوبے کا افتتاح کر دیا۔وزیر اعلیٰ نے ایم ڈی کیٹ ٹیسٹ پاس کرنے والے یتیم طلبہ کے لیے مفت اعلیٰ تعلیم فراہم کرنے کا بھی اعلان کیا۔
محمد سہیل افریدی نے کہا کہ انصاف فیمیل ایجوکیشن کارڈ سے 55 ہزار طالبات بارویں تک مفت تعلیم سے مستفید ہوں گی، خواتین کو اعلیٰ تعلیم کے ذریعے بااختیار بنانا ہماری ترجیح ہے۔تعلیم یافتہ خواتین مضبوط، خوشحال اور باشعور معاشرے کی ضمانت ہیں، پی ٹی آئی حکومت خواتین کو ترقی کے ہر میدان میں برابر مواقع دے رہی ہے۔
آئندہ بجٹ میں خواتین کی تعلیم کے لیے مزید فنڈز مختص کیے جائیں گے، انصاف ایجوکیشن کارڈ حقیقی معنوں میں صنفی مساوات کی علامت ہے۔ پی ٹی آئی دور میں تعلیم کے شعبے میں شفاف اور نتیجہ خیز اقدامات کیے گئے. یہ کارڈ خواتین کے لیے امید، خود اعتمادی اور وقار کی نئی علامت ہے، خیبر پختونخوا خواتین کی اعلیٰ تعلیم کے فروغ میں ماڈل صوبہ بنے گا۔وزیر اعلیٰ خیبر پختونخوا محمد سہیل آفریدی نے بیچلر اور ماسٹر ڈگری ہولڈرز کے لیے انٹرن شپ پروگرام شروع کرنے کی ہدایت بھی کی۔
