وزیر اعلیٰ خیبر پختونخوا محمد سہیل افریدی کی زیرِ صدارت پولیس کے سپیشل برانچ سے متعلق اہم اجلاس منعقد ہوا وزیراعلیٰ نے سپیشل برانچ کو باقاعدہ اسپیشلائزڈ یونٹ/علیحدہ کیڈر کے طور پر قائم کرنے کی منظوری دے دی۔اجلاس میں سپیشل برانچ میں 1221 اہلکاروں کی اسامیاں تخیلق کرنے کی اصولی منظوری دی گئی،وزیراعلیٰ نے انفراسٹرکچر کے لیے 1820 ملین اور موٹر وہیکلز کے لیے 904.7 ملین روپے بھی منظور کیے۔
سپیشل برانچ کو درکار تمام ہیومن ریسورس اور دیگر وسائل ترجیحی بنیادوں پر فراہم کیے جائیں گے، اسپیشل برانچ کو درکار 98 گاڑیاں اور 404 موٹر سائیکلیں ترجیحی بنیادوں پر فراہم کی جائیں گی۔وزیر اعلٰی سہیل افریدی نے مزید کہا کہ ٹیکنیکل آلات اور ٹیکنالوجی کی خریداری کے لیے 2543.9 ملین روپے فراہم کیے جائیں گے، اسپیشل برانچ کو انٹیلیجنس اور انسدادِ دہشتگردی کے تقاضوں کے مطابق جدید خطوط پر استوار کیا جائے گا۔دہشتگردی کے خلاف جنگ میں پولیس کلیدی ستون ہے، اسپیشل برانچ کی استعداد بڑھانے کے لیے تمام وسائل دیں گے، وزیر اعلیٰ نے اسپیشل برانچ کے مجوزہ الاؤنسز کو ترجیحی بنیادوں پر منظوری کے لیے پیش کرنے کی ہدایت کی۔صوبے بھر میں اسپیشل برانچ کے لیے نئی عمارتوں کے قیام کی بھی منظوری دی گئی۔اجلاس میں بریفنگ کے دوران بتایا گیا کہ اسپیشل برانچ کے اہلکار انٹیلیجنس، سیکیورٹی، ویریفیکیشن، سروے اور سرویلنس کی ذمہ داریاں سرانجام دے رہے ہیں، ضم شدہ قبائلی اضلاع کے 308 اہلکاروں کو بھی اسپیشل برانچ کا حصہ بنایا گیا ہے۔ سال 2025 میں سپیشل برانچ نے 2 خودکش جیکٹس، 32 آئی ای ڈیز، 70 راکٹ شیلز اور 288 ہینڈ گرینیڈز ناکارہ بنائے، گزشتہ سال اسپیشل برانچ نے 635 سیاسی اجتماعات کی سیکیورٹی اور اسلحہ و ایکسپلوسِو لائسنس کی ویریفیکیشن کی۔ 3124 نادرا ویریفیکیشنز، 6840 پاسپورٹ، 14518 سی پیک، 6060 پرسنل اور 9413 سرکاری اہلکاروں کی ویریفیکیشنز بھی انجام دی گئیں۔
