وائس چیئرمین ایل ڈی اے میاں مرغوب احمد اور سیکرٹری اوقاف احسان بھٹہ کی زیر صدارت ایوان اوقاف میں اہم اجلاس منعقد ہوا۔ اجلاس میں ڈی جی ایل ڈی اے طاہر فاروق اور چیف انجینئر ٹیپا اقرار حسین نے بھی شرکت کی۔اجلاس میں داتا دربار اور بھاٹی چوک کی ری ماڈلنگ اور توسیع بارے تفصیلی بریفنگ دی گئی۔داتا دربار کے اطراف مارکیٹ کی ری پلاننگ کی جائے گی۔ ٹیپا رواں ہفتے داتا دربار کی ری ماڈلنگ اور توسیع پر تعمیراتی کام بھی شروع کر دے گا۔ اجلاس میں وائس چیئرمین ایل ڈی اے میاں مرغوب احمد نے کہا کہ وزیراعلٰی پنجاب مریم نواز کی قیادت میں لاہور کے تاریخی و ثقافتی حسن کو بحال کیا جا رہا ہے۔ سیکرٹری اوقاف احسان بھٹہ نے کہا کہ حضرت داتا گنج بخش علی ہجویری رحمتہ اللہ علیہ کے دربار شریف کی ری ماڈلنگ اور توسیع ایک تاریخی اقدام ہے۔ وزیراعلٰی پنجاب کے مذہبی سیاحت کے فروغ کے وژن کے تحت داتا دربار منصو بے کی بین الاقوامی طرز پر ری ماڈلنگ کی جائے گی۔ڈی جی ایل ڈی اے طاہر فاروق نے اجلاس کو بتایا کہ ٹیپا داتا دربار اور بھاٹی چوک کی توسیع اور ری ماڈلنگ منصوبے پر کام کر رہا ہے۔ داتا دربار کے اطراف پارکنگ ایریا اور سیٹنگ ایریا ڈویلپ کیا جائے گا۔داتا دربار کے اطراف تجاوزات اور گندگی کا خاتمہ اور ڈسٹ فری علاقہ کیا جائے گا۔داتا دربار کے سامنے گرین ایریا بنایا جائے گا، پیدل چلنے کے لیے پیڈسٹرین اور واک ویز بنیں گے۔ سیکرٹری اوقاف نے منصوبے پر کام کرنے والے تمام محکموں کو انٹیگریٹڈ پلان بنانے کی ہدایت کی۔ سیکرٹری اوقاف احسان بھٹہ نے کہا کہ دربار شریف کی تزئین و آرائش و ری ماڈلنگ کے ساتھ ساتھ زائرین کی سہولیات اور معمول کی سرگرمیوں کو مدنظر رکھا جائے۔اجلاس میں ایڈمنسٹریٹر اوقاف، نمائندہ سی اینڈ ڈبلیو، نیسپاک، ایل ڈی اے، ٹیپا اور متعلقہ محکموں کے افسران نے شرکت کی۔
