فائر سیفٹی اقدامات کی تعمیل کیلئے نوٹسز جاری،فائر ایگزٹ ڈرلز اور املاک سر بمہر بھی کی جائیں گی،ڈی جی ایل ڈی اے

ڈی جی ایل ڈی اے طاہر فاروق کی ہدایت پر ایل ڈی اے کنٹرولڈ ایریا کے کمرشل املاک میں فائر سیفٹی انتظامات یقینی بنانے کے لئے ایل ڈی اے ٹاؤن پلاننگ زون تھری اور ریسکیو1122کے ہمراہ گلبرگ سکیم میں کمرشل عمارتوں میں فائر سیفٹی اقدامات کا جائزہ لیا گیا۔ ایل ڈی اے اور ریسکیوٹیموں نے گلبرگ میں حفیظ سنٹر، سنچری ٹاور، بگ سٹی اور اوریگا سنٹر اور دیگر املاک کا معائنہ کیا۔ایل ڈی اے ٹیموں نے کمرشل و ملٹی سٹوری عمارتوں کوفائر سیفٹی اقدامات کے بعد ریسکیو 1122 سے NOC حاصل کرنے بارے آگاہ کیا۔ڈی جی ایل ڈی اے نے ہائی رائز بلڈنگ اور کمرشل املاک میں ایمرجنسی سیڑھیاں اور ایگزیٹ کو ہر صورت یقینی بنانے کی ہدایت کی ہے۔ڈی جی ایل ڈی اے نے کہا کہ پہلے مرحلے میں فائر سیفٹی اقدامات کی تعمیل کے لیے نوٹسز جاری کیے جا رہے ہیں۔ دوسرے مرحلے میں فائر ایگزٹ ڈرلز اور املاک سر بمہر بھی کی جائیں گی۔ غیرقانونی کمرشل عمارتوں کے خلاف جاری آپریشن میں ایل ڈی اے ٹیموں نے مختلف علاقوں میں کارروائیاں کر کے43املاک سربمہرکر دیں۔

ایل ڈی اے ٹیموں نے گلشن راوی اور این ایف سی سکیم میں آپریشن کیا۔غیرقانونی کمرشل استعمال، کمرشل فیس کی عدم ادائیگی پرگلشن راوی میں 14املاک سیل کر دیں۔ٹیموں نے ریکوری آپریشن کے دوران این ایف سی سکیم میں 29املاک سربمہر کر دیں۔ سیل کی گئی املاک میں نجی سکول، ریستوران،کیفے، فوڈ پوائنٹ،گراسری سٹور، بیوٹی سیلون، دکانیں، دفاتر ودیگر شامل ہیں۔ آپریشن چیف ٹاؤن پلانرون اسد الزمان اور چیف ٹاؤن پلانر ٹو اظہر عل کی زیر نگرانی کیا گیا۔ آپریشن میں انفورسمنٹ ونگ، ایل ڈی اے سیکورٹی اور پولیس نے شرکت کی۔ ڈی جی ایل ڈی اے کی ہدایت پر غیرقانونی کمرشل عمارتوں،کمرشل فیس نادہندگان املاک کے خلاف بلاامتیاز کارروائیاں جاری ہیں۔