ڈی سی لاہور کیپٹن (ر) محمد علی اعجاز کی سربراہی میں ضلعی انتظامیہ لاہور نے وزیراعلیٰ پنجاب مریم نواز شریف کے ویژن کے مطابق لاہور ڈویلپمنٹ پروگرام کے تحت شہر کی تعمیر و ترقی اور انفراسٹرکچر کی بہتری کے لیے غیر معمولی اقدامات کا آغاز کر دیا ہے۔ ڈپٹی کمشنر لاہور نے تحصیل راوی کے دورے کے دوران جی ٹی روڈ لنک مین برہان روڈ، حاجی کوٹ اور کالا خطائی روڈ پر جاری ترقیاتی کاموں کا معائنہ کیا اور ایل ڈی پی فیز 2 کے منصوبوں کی رفتار کا جائزہ لیا۔ دورے کے دوران چیف آفیسر ایم سی ایل، اسسٹنٹ کمشنر راوی، واسا اور ایل ڈبلیو ایم سی کے حکام بھی موجود تھے جنہوں نے ڈی سی لاہور کو تعمیراتی کاموں پر تفصیلی بریفنگ دی۔ کیپٹن (ر) محمد علی اعجاز نے گلیوں کی تعمیر، ڈرینج، سیوریج کے میٹریل اور حفاظتی اقدامات کا خود معائنہ کیا اور واضح کیا کہ ان منصوبوں میں 100 فیصد شفافیت اور معیار کو یقینی بنایا جائے۔ انہوں نے نیسپاک کے نمائندوں اور واسا حکام کو ہدایات جاری کیں کہ سیوریج اور واٹر سپلائی کے مسائل ہنگامی بنیادوں پر حل کیے جائیں تاکہ شہریوں کو بہترین میونسپل سروسز میسر آ سکیں۔ ڈی سی لاہور نے زور دیا کہ ترقیاتی منصوبوں کا پائیدار اور مضبوط ہونا عوامی مفاد کے لیے ناگزیر ہے، اسی لیے مقررہ ٹائم لائن اور کوالٹی پر کسی قسم کا سمجھوتہ برداشت نہیں کیا جائے گا۔
لاہور ڈویلپمنٹ پروگرام؛ معیار اور شفافیت پر کوئی سمجھوتہ نہیں، ڈی سی لاہور کا سخت حکم
