وزیر اعلیٰ گلگت بلتستان حاجی گلبر خان نے دیامر، سکردو، غذر سمیت دیگر اضلاع میں درپیش سیلابی صورتحال کے پیش نظر گلگت بلتستان ڈیزاسٹرمینجمنٹ اتھارٹی، ریسکیو 1122 سمیت متعلقہ اداروں کو ریسکیو اور ریلیف کارروائیاں تیز کرنے کے احکامات دیتے ہوئے کہا ہے کہ سیلاب سے نقصانات کے بچاؤ کیلئے ہنگامی بنیادوں پر اقدامات کئے جائیں۔ وزیر اعلیٰ نے تھک چلاس کے مقام پر سیلاب کی وجہ سے سیاحوں کی گاڑیوں کو درپیش حادثے کا بھی نوٹس لیتے ہوئے ریسکیو اور ضلعی انتظامیہ کو فوری طور پر ریسکیو آپریشن کرنے کی ہدایت کی ہے۔ وزیر اعلیٰ نے عوام اور سیاحوں سے بھی اپیل کی ہے کہ بارشوں اور سیلابی صورتحال کے دوران روڈ اور موسم کے حوالے سے مکمل معلومات لینے کے بعد سفر کریں۔
