بلدیہ عظمیٰ کراچی نے شہر میں تجارتی سرگرمیوں کے فروغ، مقامی صنعتوں کی معاونت اور سرمایہ کاری کے نئے مواقع پیدا کرنے کے لیے ایک جدید ایکسپو پویلین سینٹر قائم کرنے کا فیصلہ کیا ہے۔ مجوزہ مرکز کو دبئی میں منعقدہ ورلڈ ایکسپو 2020 کے پاکستان پویلین کے طرز پر تعمیر کیا جائے گا۔میئر کراچی بیرسٹر مرتضیٰ وہاب نے یہ بات کے ایم سی ہیڈ آفس میں سول سوسائٹی کے نمایاں ارکان کے ساتھ منعقدہ اجلاس کے دوران گفتگو کرتے ہوئے کہی۔ انہوں نے کہا کہ کراچی ملک کا معاشی مرکز ہے اور یہاں تجارت، نمائشوں اور بین الاقوامی کاروباری روابط کے فروغ کے لیے جدید اور پائیدار سہولیات کا قیام ناگزیر ہے۔میئر کراچی نے کہا کہ مجوزہ ایکسپو پویلین سینٹر کراچی کی صنعتی اور تجارتی صلاحیتوں کو اجاگر کرنے کے لیے ایک مؤثر پلیٹ فارم فراہم کرے گا، جہاں مقامی مصنوعات کو ملکی اور بین الاقوامی منڈیوں تک متعارف کرایا جا سکے گا۔ ان کے مطابق اس اقدام کا مقصد برآمدات میں اضافہ، تجارتی روابط کو مضبوط بنانا اور تاجروں و صنعتکاروں کو عالمی خریداروں سے منسلک ہونے کے مواقع فراہم کرنا ہے۔بیرسٹر مرتضیٰ وہاب نے بتایا کہ یہ مرکز باغ ابنِ قاسم میں قائم کیا جائے گا، جو شہر کی ایک اہم اور موزوں جگہ ہے اور جہاں بڑے پیمانے پر تجارتی اور نمائشی سرگرمیوں کے لیے مناسب اراضی دستیاب ہے۔ انہوں نے کہا کہ اگر کراچی کے تاجروں اور صنعتوں کو مناسب سہولیات فراہم کی جائیں اور تجارتی روابط کو مؤثر انداز میں فروغ دیا جائے تو شہر کے لیے آمدنی، کاروبار اور انفراسٹرکچر کی بہتری کے حوالے سے مزید مواقع پیدا کیے جا سکتے ہیں اور کراچی کو دوبارہ عالمی تجارتی مرکز کے طور پر ابھارا جا سکتا ہے۔اجلاس کے دوران میئر کراچی نے میونسپل کمشنر سید ابرار جعفر کو ہدایت کی کہ مجوزہ منصوبے کے حوالے سے ایک جامع فزیبلٹی رپورٹ تیار کی جائے اور باغ ابنِ قاسم میں اندرونی نمائشی مرکز کے قیام کے لیے مناسب اراضی مختص کی جائے۔ انہوں نے مزید ہدایت کی کہ اس منصوبے کو پبلک پرائیویٹ پارٹنرشپ (پی پی پی) کے تحت مکمل کیا جائے تاکہ اس کی مؤثر اور پائیدار تکمیل ممکن ہو سکے۔میئر کراچی نے کہا کہ اس منصوبے کا مقصد دبئی ورلڈ ایکسپو میں قائم پاکستان پویلین کی طرز پر ایک مستقل پاکستان پویلین قائم کرنا ہے، جو مقامی صنعتکاروں، برآمد کنندگان اور بین الاقوامی خریداروں کے لیے ایک ون ونڈو پلیٹ فارم فراہم کرے گا۔ انہوں نے کہا کہ بڑھتی ہوئی تجارتی سرگرمیوں اور برآمدات کے پیش نظر کراچی میں ایک جدید اور عالمی معیار کے نمائشی مرکز کی ضرورت ہے جہاں بین الاقوامی تجارتی میلوں، صنعتی نمائشوں اور سرمایہ کاری سے متعلق تقریبات کا انعقاد کیا جا سکے۔بیرسٹر مرتضیٰ وہاب نے کراچی کی معاشی ترقی کے لیے اپنے عزم کا اعادہ کرتے ہوئے کہا کہ کراچی تاریخی طور پر ملک کی معاشی ریڑھ کی ہڈی رہا ہے اور اس میں دوبارہ عالمی تجارتی مرکز بننے کی بھرپور صلاحیت موجود ہے۔ انہوں نے کہا کہ انفراسٹرکچر کی بہتری، صنعتوں کی سہولت کاری اور نجی شعبے کے ساتھ شراکت داری کے ذریعے شہر کو دوبارہ اپنی معاشی اہمیت دلائی جا سکتی ہے۔انہوں نے مزید کہا کہ کراچی میں جاری ترقیاتی اقدامات چیئرمین پاکستان پیپلز پارٹی بلاول بھٹو زرداری کے وژن کے مطابق ہیں، جو ہمیشہ پائیدار شہری ترقی اور معاشی بحالی پر زور دیتے رہے ہیں۔ میئر کراچی نے کہا کہ کراچی ان کے چیئرمین کا شہر ہے اور اس کے شہریوں کو ہر شعبے میں بہتر سہولیات فراہم کرنے کے لیے تمام ممکنہ اقدامات کیے جائیں گے۔انہوں نے کہا کہ شہر میں جاری ترقیاتی منصوبوں کے نتائج اب نمایاں ہونا شروع ہو گئے ہیں اور رواں سال کے دوران کراچی کی بہتری کے لیے مزید منصوبے متعارف کرائے جائیں گے۔اجلاس میں شاہد عبداللہ، میونسپل کمشنر ابرار جعفر، مالیاتی مشیر گلزار ابڑو سمیت دیگر متعلقہ حکام اور سول سوسائٹی کے نمائندوں نے شرکت کی۔
