*پنجاب ڈویلپمنٹ پلان کی بروقت تکمیل کیلئے اضلاع میں افرادی قوت اور مشینری کی تعداد بڑھانے کا فیصلہ*

صوبائی وزیر برائے ہاؤسنگ بلال یاسین کی زیر صدارت پی ڈی پی کے تحت واسا کے ترقیاتی کاموں کی رفتار کا جائزہ اجلاس ہوا۔ سیکرٹری ہاؤسنگ نورالامین مینگل اور ڈی جی واسا پنجاب طیب فرید نے اضلاع کی کارکردگی بارے تفصیلی بریفنگ دی۔ اجلاس میں پنجاب ڈویلپمنٹ پلان کی بروقت تکمیل کیلئے اضلاع میں افرادی قوت اور مشینری کی تعداد بڑھانے کا فیصلہ کیا گیا۔ تعمیراتی کاموں میں سست روی اور غیر معیاری میٹریل کا استعمال ثابت ہونے پر کمپنیوں کو بلیک لسٹ کیا جائے گا۔ بارشی صورتحال کے باعث متعدد اضلاع میں کام کی رفتار 24 گھنٹے بڑھا دی گئی، باقاعدہ مانیٹرنگ بھی ہوگی۔ ابتدائی مرحلے میں پنجاب کے 15 شہروں میں واسا کمپلیکس تعمیر کرنے کا۔ بی فیصلہ کیا گیا ہے۔ صوبائی وزیر برائے ہاؤسنگ نے تمام اضلاع کے واسا ایم ڈیز کو ڈی سلٹنگ مہم فوری شروع کرنے کی ہدایات جاری کیں۔ وزیر ہاؤسنگ کا کہنا تھا کہ موجودہ نالوں کی گہرائی اور چوڑائی کو بڑھانے اور طغیانی کے باعث آبادیوں کا تحفظ اولین ترجیح ہے۔ 15 اضلاع میں ہنگامی حالات کو مدنظر رکھتے ہوئے اہداف کو بروقت مکمل کیا جائے گا۔ وزیر ہاؤسنگ بلال یاسین نے واضح کیا کہ بارشی پانی کی بروقت نکاسی اور سلٹنگ میں درپیش چینلنجز کا بروقت تدارک اولین ذمہ داری ہے۔ 15 اضلاع کے واسا ایم ڈیز نے بذریعہ ویڈیو لنک اجلاس میں شرکت کی ۔