*لاہور میں جمعہ 8مئی لبرٹی میں معرکہ حق گرینڈ تقریب ہوگی۔کمشنر لاہور مریم خان*

کمشنر لاہور ڈویژن مریم خان نے کہا ہے کہ عظیم معرکہ حق تقریبات کے حوالے سے لاہور ضلعی انتظامیہ کی جانب سے تیاریاں عروج پر ہیں۔ انہوں نے کہا کہ لاہور میں جمعہ 8مئی لبرٹی چوک گلبرگ میں معرکہ حق گرینڈ تقریب ہوگی اور تین دن 8۔ 9 اور 10مئی کو پورے لاہور میں معرکہ حق ریلیاں، واکس اور تقریبات منعقد ہونگی۔ کمشنر لاہور نے کہا کہ شہریوں کا معرکہ حق( بنیان المرصوص) گرینڈ تقریب لبرٹی چوک گلبرگ میں داخلہ اوپن ہوگا، ضلعی انتظامیہ کے تحت کمیٹی فیلڈ میں موجود ہے تمام انتظامات کو بہترین انداز میں مکمل کیا جارہا ہے، معرکہ حق لبرٹی تقریب کیلیے بہترین ٹریفک اور پارکنگ انتظامات کیے جارہے ہیں۔ کمشنر لاہور نے کہا کہ سکیورٹی، صفائی، روڈ ڈائیورژنز، میونسپل انتظامات کو بہترین مینیجمنٹ کے ساتھ ترتیب دیا جائیگا۔ لاہور سمیت تمام اضلاع میں معرکہ حق تقریبات کو شایان شان انداز میں منایا جارہا ہے۔کمشنر لاہور مریم خان کی زیر صدارت عظیم معرکہ حق تقریبات انتظامات کے حوالے سے اجلاس منعقد ہوا۔ اجلاس میں لاہور کی تمام مارکیٹ ایسوسی ایشنز نے شرکت کی۔ کمشنر لاہور مریم خان نے اجلاس کی صدارت کرتے ہوئے کہا کہ معرکہ حق سے پاکستان کا معزز نام دنیا میں سربلند ہوا، معرکہ حق ہمارا فخر ہے، معرکہ حق ہماری درخشاں تاریخ کے سنہرے معرکوں میں شامل ہے۔ انہوں نے کہا کہ پاک افواج نے قرطاس دہر پر شجاعت کی نئی داستان رقم کی۔ کمشنر لاہور نے مزید کہا کہ معرکہ حق تقریبات کے حوالے سے ہر پاکستانی پرجوش ہے، آئیے فتح پر شکر ادا کریں اور اپنے ہیروز کو سلام عقیدت پیش کریں۔اجلاس میں ڈی سی لاہور کیپٹن ر علی اعجاز، سی ٹی او لاہور، ایس ایس پی آپریشنز توقیر احمد، ایڈیشنل کمشنر راؤ عبدالجبار سمیت لاہور کی تمام مارکیٹ ایسوسی ایشنز، پی ایچ اے، ٹریفک پولیس و دیگر محکموں کے افسران نے شرکت کی۔