وزیر بلدیات ذیشان رفیق نے سُتھرا پنجاب اتھارٹی آفس میں ایک اجلاس کے دوران عیدالاضحیٰ کے صفائی آپریشنز کے لئے ضروری ہدایات جاری کی ہیں۔ تمام اضلاع کے مینجنگ ڈائریکٹرز سُتھرا پنجاب ایجنسیز نے اجلاس میں بذریعہ ویڈیو لنک شرکت کی۔وزیر بلدیات ذیشان رفیق نے تمام ضلعی سُتھرا پنجاب ایجنسیز کو الائشوں کے لئے اضافی عارضی کولیکشن پوائنٹس بنانے کی ہدایت کرتے ہوئے خبردار کیا کہ وزیراعلیٰ مریم نواز شریف اس بار بھی عید صفائی آپریشنز کی خود نگرانی کریں گی لہذا کسی سُستی کی کوئی گنجائش نہیں۔ انہوں نے کہا کہ صوبائی سطح پر سُتھرا پنجاب اتھارٹی میں خصوصی کنٹرول روم قائم کیا جائے گا۔ ہر ضلع میں بھی ڈپٹی کمشنر آفس میں مانیٹرنگ روم قائم کیا جائے۔ وزیر بلدیات نے کہا کہ سُتھرا پنجاب پروگرام اب تجرباتی مراحل سے گزر چکا ہے۔ ایک میچور ٹیم کے ساتھ اب ہمیں پہلے سے بہتر نتائج دینا ہوں گے۔ ہمیں عوام اور وزیراعلیٰ مریم نواز کی توقعات پر ہر صورت میں پورا اترنا ہے۔ عید کی چھٹیوں کے دوران شہریوں کی شکایات پر فوری ایکشن لیا جائے۔ ذیشان رفیق نے کہا کہ عید صفائی آپریشنز میں میونسپل اداروں کا عملہ بھی سُتھرا پنجاب ایجنسیز کے ساتھ تعاون کرے گا۔ انہوں نے زور دیا کہ مویشی منڈیوں کی صفائی کے لئے بھی خصوصی اقدامات کئے جائیں۔ ہر شہر میں آگاہی کیمپ لگائے جائیں گے جہاں عملہ شہریوں کی رہنمائی کرے گا۔
عید صفائی آپریشنز میں میونسپل اداروں کا عملہ بھی سُتھرا پنجاب ایجنسیز کے ساتھ تعاون کرے گا،وزیر بلدیات ذیشان رفیق
