نوجوان نسل کو منشیات سے محفوظ رکھنے کا مشن لیے سیکرٹری داخلہ پنجاب نے منشیات کے تدارک کیلئے متحرک سول سوسائٹی ممبران سے محکمہ داخلہ میں ملاقات کی۔ ملاقات کے دوران معاشرے سے منشیات کے خاتمے کیلئے مشترکہ قومی عزم، سماجی یکجہتی اور ہم آہنگی کے فروغ بارے تبادلہ خیال کیا گیا۔ سیکرٹری داخلہ سے سول سوسائٹی ممبران کی خصوصی ملاقات کا اہتمام پنجاب چیریٹیز کمیشن نے کیا تھا۔ سیکرٹری داخلہ پنجاب ڈاکٹر احمد جاوید قاضی نے اس موقع پر گفتگو کرتے ہوئے کہا کہ پُرامن، صحت مند اور ہم آہنگ معاشرے کا قیام حکومت پنجاب کی اولین ترجیح ہے۔ انہوں نے بتایا کہ محکمہ داخلہ پنجاب منشیات کی روک تھام کیلئے آگاہی مہم چلا رہا ہے جس میں معاشرے کے مختلف طبقات حصہ لے رہے ہیں۔ سب سے بڑھ کر حکومتِ پنجاب نے معاشرے کے معزز ارکان علماء کرام اور امام مسجد صاحبان کو آن بورڈ لیا ہے۔ اس وقت پنجاب میں رجسٹرڈ 76 ہزار آئمہ مساجد اپنے خطبات اور درس میں منشیات سے بچاؤ کیلئے آگاہی دے رہے ہیں۔ سیکرٹری داخلہ پنجاب نے بتایا کہ کنٹرول آف نارکوٹکس سبسٹنس ایکٹ 1997 اور ڈرگز ایکٹ 1976 کے تحت منشیات کی تیاری، تصرف، تقسیم اور ترسیل سنگین جرائم ہیں۔ انہوں نے بتایا کہ پنجاب میں منشیات کے خلاف سخت قوانین نافذ ہیں جن کے تحت 25 سال تک قید اور بھاری جرمانے ہو رہے ہیں۔ خاص طور پر تعلیمی اداروں کے گردونواح میں منشیات کے استعمال یا فروخت پر سخت ترین سزائیں دی جا رہی ہیں۔ سیکرٹری داخلہ نے بتایا کہ پنجاب کی جیلوں میں 19,000 سے زائد قیدی منشیات کے استعمال یا خریدوفروخت کے جرم میں قید ہیں جو نہایت تشویشناک امر ہے۔ انہوں نے بتایا کہ گزشتہ سال کے دوران پنجاب میں 76 ہزار ڈرگ ڈیلرز گرفتار کر کے 74 کروڑ سے زائد کے اثاثے منجمد کیے گئے۔ سیکرٹری داخلہ نے کہا کہ نوجوانوں کو منشیات سے محفوظ رکھنے کیلئے حکومت اور سول سوسائٹی کی مشترکہ کاوشیں ناگزیر ہیں۔ انہوں نے شہریوں سے اپیل کی کہ وہ اپنے گردونواح منشیات کے حوالے سے مشکوک سرگرمی دیکھیں تو پنجاب کاؤنٹر نارکوٹکس فورس کی ہیلپ لائن 1012 پر اطلاع دیں، انکی شناخت صیغہ راز میں رہے گی۔ اس موقع پر گفتگو کرتے ہوئے سول سوسائٹی ممبران نے منشیات کی روک تھام کے قومی مشن کیلئے باہمی تعاون کے فروغ، آگاہی اور مربوط حکمتِ عملی پر زور دیا۔ سول سوسائٹی سے ملاقات میں سی سی او پنجاب چیریٹیز کمیشن کرنل شہزاد امیر، ڈی جی پیرول اینڈ پروبیشن شاہد اقبال، ڈی سی او CoE-CVE ڈاکٹر احمد خاور شہزاد اور ڈائریکٹر سول ڈیفنس تسنیم علی خان اور متعلقہ حکام نے شرکت کی۔ ملاقات کے دوران ڈی جی پروبیشن اینڈ پیرول شاہد اقبال نے حادثاتی مجرمان کیلئے متعارف کروائے گئے کمیونٹی سروس ماڈل بارے بریفنگ دی۔ چیف کوارڈینیشن آفیسر پنجاب چیریٹیز کمیشن کرنل شہزاد امیر نے منشیات کے تدارک ادارے کیلئے کیے گئے اقدامات بارے بریفنگ دی۔ ڈپٹی کوآرڈینیشن آفیسر پنجاب سینٹر آف ایکسیلینس آن کاؤنٹرنگ وائلنٹ ایکسٹریمزم ڈاکٹر احمد خاور شہزاد نے اس ضمن میں ادارے کا تین سالہ پلان پیش کیا۔ ڈائریکٹر سول ڈیفنس تسنیم علی خان نے پنجاب میں لاکھوں نوجوان رضاکاروں کی جاری تربیت بارے بریفنگ دی۔
سیکرٹری داخلہ پنجاب ڈاکٹر احمد جاوید قاضی کی منشیات کے تدارک کیلئے متحرک سول سوسائٹی ممبران سے ملاقات
