وزیر بلدیات ذیشان رفیق کی زیر صدارت سول سیکرٹریٹ میں ہونے والے صوبہ بھر کی ویسٹ مینجمنٹ کمپنیوں کے سی ای اوز کے بذریعہ ویڈیو لنک اجلاس کے دوران پنجاب میں صفائی کے موثر اور دیرپا نظام کے منصوبے کا جائزہ لیا گیا۔ سیکرٹری لوکل گورنمنٹ شکیل احمد میاں، ایڈیشنل سیکرٹری ماریہ طارق نے بھی شرکت کی۔ ویسٹ مینجمنٹ کمپنیوں کے سی ای اوز نے اپنے اپنے علاقوں میں اب تک ہونے والی پیشرفت سے آگاہ کیا۔ اس موقع پر وزیر بلدیات ذیشان رفیق نے کہا کہ پنجاب بھر میں صفائی کا یکساں نظام رائج کرنا وزیراعلی مریم نواز شریف کا ویژن ہے۔ دیہی علاقوں میں آبادی کا بہت بڑا حصہ مقیم ہے لہذا دیہات کو نظرانداز کر کے صفائی کے اہداف حاصل کرنا ممکن نہیں۔ وزیر بلدیات نے کہا کہ شہری علاقوں کے ساتھ پہلی بار دیہات کو صفائی کے نظام کے دائرہ کار میں لایا جا رہا ہے۔ یہ ایک بڑا چیلنج ہے لیکن وزیراعلی مریم نواز شریف کی قیادت میں یہ پراجیکٹ بھی عوام کی سہولت کا باعث بنے گا۔ ذیشان رفیق نے کہا کہ آئوٹ سورسنگ سسٹم کے ذریعے صفائی کے چیلنجز سے نمٹا جا سکتا ہے۔ دنیا کے کامیاب سسٹمز کا مطالعہ کر کے پنجاب میں پائلٹ پراجیکٹ لا رہے ہیں۔ انہوں نے کہا کہ شہریوں کی شرکت ماڈل پراجیکٹ کی کامیابی میں سب سے اہم ہے۔ کوڑا اٹھانے سے زیادہ محفوظ ویسٹ ڈمپنگ زیادہ بڑا چیلنج ہے۔ ضرورت اس امر کی ہے کہ عوام میں آگاہی بڑھانے کے لئے ویسٹ مینجمنٹ کمپنیاں خصوصی مہم چلائیں۔ ذیشان رفیق نے کہا کہ عیدالاضحٰی پر کامیاب صفائی آپریشن سے ثابت ہوگیا کہ کوئی کام ناممکن نہیں۔ اسی جذبے کو بروئے کار لاتے ہوئے پنجاب کو صاف صوبہ اور پاکستان کو صاف ملک بنانا ہوگا۔ صوبائی وزیر نے ہدایت کی کہ ویسٹ مینجمنٹ کمپنیاں آئوٹ سورسنگ کا عمل ٹائم فریم کے مطابق مکمل کریں اور وزیراعلی مریم نواز شریف کے مقرر کردہ اہداف حاصل کئے جائیں۔ سیکرٹری لوکل گورنمنٹ شکیل احمد میاں نے شرکا سے خطاب کرتے ہوئے کہا کہ تمام سی ای اوز باقاعدگی کے ساتھ ڈیش بورڈ پر اپ ڈیٹ لوڈ کریں اور آئوٹ سورسنگ کی مانیٹرنگ کے ایس او پیز کو بھی حتمی شکل دی جائے۔
دنیا کے کامیاب سسٹمز کا مطالعہ کر کے پنجاب میں صفائی کا پائلٹ پراجیکٹ لا رہے ہیں، ذیشان رفیق
