ماسٹرپلان برائے لاہور ڈویژن 2050 کی عوامی شنوائی کاانعقاد ایل ڈی اے سپورٹس کمپلیکس گلبرگ میں کیاگیا۔چیف میٹروپولیٹن پلانر ایل ڈی اے فیصل مسعود قریشی نے شرکاءکو ماسٹر پلان 2050کے متعلق آگاہ کیااورمعروف آرکیٹکٹ و ممبر لاہور بچاو تحریک کامل خان ممتاز اور پروفیسر شاکر محمود نے 2019 سے 2026 تک ماسٹرپلان کی تیاری اور مختلف مراحل کے متعلق آگاہ کیا۔چیئرمین آباد ایس ایم نبیل نے ماسٹر پلان کی اہمیت وضرورت کے متعلق آگاہ کیا۔سیمینار میں لاہور ماسٹر پلان پر کام کرنے والی انٹرنیشنل کنسلٹنٹ فرم دارالہندسہ نے تفصیلی بریفنگ دی اوربتایا کہ ماسٹر پلان میں شہریوں کی مشاورت کو بھی شامل کیا جارہاہے۔ ماسٹر پلان میں محکمہ ماحولیات کی تجاویزو سفارشات کو بھی شامل کیاجارہاہے۔ماسٹر پلان میں لاہور ڈویڑن کے تمام اضلاع، لاہور، شیخو پورہ، قصور اور ننکانہ کے ماسٹر پلان کا بھی جائزہ لیا گیا ہے۔ مستقبل کی آبادی میں ممکنہ اضافہ، بے ہنگم پھیلاو اور رہائشی ضروریات کو مدنظر رکھا گیا ہے۔شہری سہولیات، پبلک ٹرانسپورٹیشن، سفری و پیڈسٹرین ضروریات کے مطابق پلاننگ کی جا رہی ہے۔ماسٹر پلان میں لاہور کی ثقافت، پارک، گرینری اور پانی کے وسائل کو بھی پلاننگ کا حصہ بنایا گیا ہے۔ماحولیاتی آلودگی، سموگ، انڈسٹری کے بے ہنگم پھیلاواور سوشل و اکنامک چیلنجز کو بھی مدنظر رکھا گیا ہے۔شہر میں ہائی رائز بلڈنگ ،کمرشل و رہائشی ہائی رائز املاک کی تعمیر کو فروغ دیاجائے گا۔لاہور ماسٹر پلان میں روڈا، سی بی ڈی، کنٹونمنٹ، ڈی ایچ اے کے ایریا کی پلاننگ کو شامل کیاجا رہا ہے۔ اربن یونٹ اور ڈبلیوڈبلیو ایف کی بطور بیرونی جائزہ کار ماسٹر پلان کی سفارشات کو شامل کیا جا رہا ہے۔ڈویلپرز اور دیگر سٹیک ہولڈرز کے ساتھ مل کر ٹیکنیکل ایشوز کو حل کیا جا رہا ہے۔ انٹرنیشنل کنسلٹنٹ فرم دارلہندسہ نے ماسٹر پلان کی پلاننگ اور زوننگ تجاویزکے بارے میں بھی بریفنگ دی۔سیمینارکے شرکاءکو بتایا گیا کہ آئندہ دنوں میں شیخوپورہ، قصور اور ننکانہ میں بھی عوامی شنوائی رکھی گئی ہیں۔ سیمینار میں سٹیک ہولڈرز، کنسلٹنٹس اورشہریوں کی کثیرتعدادنے شرکت کی۔سیمینارکے اختتام پر کنسلٹنٹ نے شہریوں کے سوالوں کے جوابات دئیے اوربتایا کہ عوامی شنوائی میں دی گئی تجاویز کا تفصیلی جائزہ لیا جائے گا۔
