چیف الیکشن کمشنر گلگت بلتستان راجہ شہباز خان (تمغہ شجاعت) کی خصوصی ہدایات پر بلدیاتی انتخابات 2026 کے پیش نظر ووٹر رجسٹریشن، ووٹ کی منتقلی اور انتخابی فہرستوں میں کوائف کی درستگی کے عمل کی مدت میں مزید توسیع کرتے ہوئے اسے 31 جولائی 2026 تک بڑھا دیا گیا ہے، تاکہ کوئی بھی شہری اپنے حقِ رائے دہی سے محروم نہ رہے۔الیکشن کمیشن سیکریٹریٹ گلگت بلتستان کی جانب سے جاری کردہ سرکلر کے مطابق اس سے قبل مذکورہ عمل کی مدت 25 جولائی تک بڑھائی گئی تھی، تاہم عوامی سہولت اور زیادہ سے زیادہ ووٹروں کو رجسٹریشن، منتقلی اور کوائف کی تصحیح کا موقع فراہم کرنے کے لیے چیف الیکشن کمشنر نے اس مدت میں مزید توسیع کی منظوری دے دی ہے۔سرکلر میں تمام رجسٹریشن افسران (ROs) اور اسسٹنٹ رجسٹریشن افسران (AROs) کو ہدایت کی گئی ہے کہ وہ 31 جولائی 2026 تک اپنے دفاتر سرکاری تعطیلات میں بھی کھلے رکھیں اور بلا تعطل فارم نمبر 13 (رجسٹریشن، منتقلی) اور فارم نمبر 14 (کوائف کی درستگی) وصول کرتے رہیں تاکہ عوام کو ہر ممکن سہولت فراہم کی جا سکے۔علاوہ ازیں چیف الیکشن کمشنر گلگت بلتستان نے تمام متعلقہ رجسٹریشن افسران (ROs) کو ہدایت جاری کی ہے کہ اب تک موصول ہونے والے فارم نمبر 13 اور فارم نمبر 14 کی تمام درخواستیں پیر کے روز الیکشن کمیشن سیکریٹریٹ گلگت بلتستان،گلگت میں جمع کرائی جائیں، تاکہ ان کا عمل فوری طور پر شروع کیا جا سکے اور انتخابی فہرستوں کی بروقت تکمیل کو یقینی بنایا جا سکے۔چیف الیکشن کمشنر گلگت بلتستان راجہ شہباز خان نے اس حوالے سے کہا ہے کہ الیکشن کمیشن شفاف، منصفانہ اور عوام دوست بلدیاتی انتخابات کے انعقاد کے لیے تمام ضروری اقدامات بروئے کار لا رہا ہے۔ انہوں نے شہریوں سے اپیل کی کہ وہ اس توسیع سے بھرپور فائدہ اٹھاتے ہوئے مقررہ مدت کے اندر اپنی ووٹر رجسٹریشن، ووٹ کی منتقلی اور انتخابی کوائف کی درستگی کا عمل مکمل کریں تاکہ بلدیاتی انتخابات میں اپنے آئینی اور جمہوری حقِ رائے دہی کا مؤثر استعمال یقینی بنا سکیں۔
گلگت بلتستان، بلدیاتی انتخابات 2026ء کیلئے ووٹر رجسٹریشن، منتقلی اور کوائف کی درستگی کی تاریخ میں مزید توسیع
