میئر کراچی بیرسٹر مرتضیٰ وہاب نے کہا ہے کہ ماہ ربیع الاول امت مسلمہ کے لیے انتہائی مقدس، بابرکت اور روحانی اہمیت کا حامل مہینہ ہے کیونکہ اسی مہینے میں خاتم النبیین حضرت محمد ﷺ اس دنیا میں تشریف لائے اور انسانیت کو گمراہی، جہالت اور تاریکی سے نکال کر قرآن مجید کی صورت میں رشد و ہدایت کا وہ ابدی پیغام عطا کیا جو قیامت تک انسانوں کی رہنمائی کرتا رہے گا، ربیع الاول کے موقع پر شہری سہولیات کی فراہمی اور بلدیاتی انتظامات کو بہتر بنانا صرف سرکاری ذمہ داری نہیں بلکہ ہمارے لیے باعثِ سعادت ہے اور کوشش کی جائے گی کہ بارہ ربیع الاول سے قبل شہری مسائل کو حل کرنے کے لئے لائحہ عمل تیار کرلیا گیا ہے، ان خیالات کا اظہار انہوں نے پیر کے روز بلدیہ عظمیٰ کراچی کے صدر دفتر میں واقع کونسل ہال میں ماہ ربیع الاول کے انتظامات کے حوالے سے منعقدہ اجلاس کی صدارت کرتے ہوئے کیا،
اس موقع پر ڈپٹی میئر کراچی سلمان عبداللہ مراد، ایم ڈی سندھ سالڈ ویسٹ مینجمنٹ بورڈ فواد غفار سومرو، واٹر کارپوریشن کے سی ای او احمد علی صدیقی، واٹر کارپوریشن کے چیف آپریٹنگ آفیسر اسد اللہ خان،میئر کراچی کے ترجمان برائے سیاسی امور کرم اللہ وقاصی، سٹی کونسل کے اراکین، علماء کرام، مشائخ عظام اور منتظمین جلوس کی ایک بڑی تعداد موجود تھی، میئر کراچی بیرسٹر مرتضیٰ وہاب نے اجلاس سے خطاب کرتے ہوئے کہا کہ نبی کریم ﷺ کی سیرت طیبہ پوری انسانیت کے لیے بہترین نمونہ ہے، آپ ﷺ نے زندگی کے ہر شعبے میں رہنمائی فراہم کی، انہوں نے کہا کہ حضور اکرم ﷺ سے حقیقی محبت کا تقاضا یہ ہے کہ ہم اپنی عملی زندگی میں سنت نبوی ﷺ کی پیروی کریں اور اپنے کردار و عمل سے اس محبت کا ثبوت دیں، انہوں نے کہا کہ ربیع الاول کے انتظامات ایک مقدس فریضہ ہیں، جنہیں علماء کرام کی مشاورت اور تعاون سے مزید مؤثر اور منظم بنایا جائے گا تاکہ شہریوں کو بہترین سہولیات فراہم کی جا سکیں،انہوں نے کہا کہ کورنگی نمبر 5 پر تعمیر ہونے والے فلائی اوور کو 15 اگست کو کھول دیا جائے، بلدیہ عظمیٰ کراچی نے 20 کروڑ روپے کے ٹینڈرز جاری کردیئے ہیں تاکہ تمام اضلاع میں فوری طور پر کام کیا جاسکے، میئر کراچی نے کہا کہ شہر کے تاریخی ریگل چوک کا نام تبدیل کرکے ”ختمِ نبوتؐ چوک“ رکھا جائے گا، انہوں نے کہا کہ ماہ ربیع الاول کے بابرکت موقع پر ختمِ نبوتؐ چوک کی ازسرنو تعمیر، تزئین و آرائش، خوبصورتی، خصوصی روشنی اور اطراف کی صفائی کے جامع انتظامات کیے جائیں گے تاکہ یہ مقام مذہبی عقیدت، احترام اور شہر کی خوبصورتی کی بہترین علامت بن سکے، انہوں نے کہا کہ ربیع الاول کے مقدس مہینے کے دوران شہریوں کو ہر ممکن بلدیاتی سہولیات کی فراہمی کے لیے بھرپور اقدامات کیے جائیں گے،اس اعلان پر اجلاس میں شریک علماء کرام نے خوشی اور اطمینان کا اظہار کرتے ہوئے میئر کراچی بیرسٹر مرتضیٰ وہاب کے اقدام کو سراہا۔ علماء کرام نے ختمِ نبوتؐ چوک کی تعمیر و آرائش اور اس کی مذہبی و تاریخی اہمیت کو اجاگر کرنے کے فیصلے کو خوش آئند قرار دیتے ہوئے امید ظاہر کی کہ اس منصوبے سے شہر میں دینی شعائر کے احترام اور شہری ماحول کی بہتری کو فروغ ملے گا،اجلاس کے دوران علماء کرام اور جلوسوں کے منتظمین نے شہر میں درپیش مختلف بلدیاتی مسائل سے آگاہ کرتے ہوئے متعدد تجاویز پیش کیں۔ شرکاء نے صفائی ستھرائی کے نظام میں بہتری، سڑکوں کی فوری مرمت، تجاوزات کے خاتمے، سیوریج لائنوں کی درستگی، جلوسوں کی سیکورٹی کے مؤثر انتظامات اور کے الیکٹرک کی جانب سے لوڈشیڈنگ کے مسئلے کے حل پر خصوصی توجہ دینے کی ضرورت پر زور دیا، اجلاس میں علماء کرام اور جلوسوں کے منتظمین کی بڑی تعداد نے شرکت کی اور اپنے اپنے علاقوں کے مسائل تفصیل سے بیان کیے،اجلاس کے اختتام پر علماء کرام اور جلوسوں کے منتظمین نے میئر کراچی بیرسٹر مرتضیٰ وہاب کا شکریہ ادا کرتے ہوئے کہا کہ ربیع الاول کے انتظامات کے سلسلے میں علماء سے مشاورت اور ان کے مسائل سننے کا اقدام قابل تحسین ہے، انہوں نے اس امید کا اظہار کیا کہ بلدیہ عظمیٰ کراچی دیگر متعلقہ اداروں کے تعاون سے جلسوں اور جلوسوں کے دوران سیکورٹی اور بلدیاتی سہولیات کو مزید بہتر بنانے کے لیے مؤثر اقدامات کرے گی۔
*میئر کراچی بیرسٹر مرتضیٰ وہاب کی زیر صدارت ربیع الاول کے انتظامات کے حوالے سے اجلاس*
