ڈپٹی کمشنر لاہور کیپٹن (ر) محمد علی اعجاز کی قیادت میں ضلعی انتظامیہ نے ہربنس پورہ میں گھر کی چھت گرنے کے افسوسناک واقعے کے بعد جاری ریسکیو آپریشن کو تمام تر انتظامی صلاحیتیں بروئے کار لاتے ہوئے کامیابی سے مکمل کر لیا ہے، جہاں واقعہ کی اطلاع موصول ہوتے ہی ڈپٹی کمشنر لاہور کیپٹن (ر) محمد علی اعجاز اسسٹنٹ کمشنر شالیمار محمد عامر بٹ کے ہمراہ رات گئے جائے وقوعہ پر پہنچ گئے اور ریسکیو آپریشن کے تمام مراحل کی خود مانیٹرنگ کی تاکہ انسانی جانوں کے تحفظ کو ہر صورت یقینی بنایا جا سکے اور امدادی سرگرمیوں میں کسی قسم کا تعطل پیدا نہ ہو سکے۔ اس ہنگامی آپریشن کے دوران ضلعی انتظامیہ اور ریسکیو 1122 کی ٹیموں نے جدید ٹیکنیکل مہارت اور بھاری مشینری کا استعمال کرتے ہوئے متاثرہ مکان کے ملبے کو ہٹانے کا عمل انتہائی تندہی سے جاری رکھا جس کے نتیجے میں ملبے تلے دبے 6 زخمیوں کو بحفاظت نکال کر فوری طبی امداد کے لیے ہسپتال منتقل کر دیا گیا جہاں ان چنی امداد دی جارہی ہے۔ ڈپٹی کمشنر لاہور نے جائے وقوعہ پر موجود رہ کر اس امر کو یقینی بنایا کہ آپریشن کے آغاز سے تکمیل تک کوئی بھی انتظامی کسر اٹھا نہ رکھی جائے اور انہوں نے ہسپتال انتظامیہ کو بھی سخت ہدایات جاری کی ہیں کہ زخمیوں کو بہترین اور اعلیٰ درجے کی طبی سہولیات کی فراہمی میں کوئی کوتاہی برداشت نہیں کی جائے گی جبکہ جانی نقصان پر گہرے دکھ کا اظہار کرتے ہوئے انہوں نے واضح کیا کہ شہریوں کی جان و مال کا تحفظ ضلعی انتظامیہ کی اولین اور بنیادی ترجیح ہے جس پر کوئی سمجھوتہ نہیں کیا جا سکتا۔ کیپٹن (ر) محمد علی اعجاز نے اسسٹنٹ کمشنر شالیمار کو واقعے کی وجوہات کا باریک بینی سے جائزہ لینے کے لیے تفصیلی انکوائری رپورٹ فوری طور پر پیش کرنے کا حکم دیا ہے تاکہ مستقبل میں ایسے حادثات کے سدباب کے لیے موثر حکمت عملی وضع کی جا سکے اور ساتھ ہی متعلقہ محکموں کو ہدایت کی ہے کہ متاثرہ مقام سے ملبے کی مکمل صفائی اور ٹریفک کی روانی کی بحالی کو ہنگامی بنیادوں پر مکمل کیا جائے۔
ہربنس پورہ واقعے میں 11 افراد جاں بحق، اے سی شالیمار کو ہربنس پورہ حادثے کی تفصیلی انکوائری رپورٹ کی ہدایت
