وزیراعلیٰ پنجاب مریم نواز شریف کے وژن کے مطابق لاہور کو ماڈل ہارٹیکلچر سٹی بنانے کے لیے عملی اقدامات کا آغاز کر دیا گیا ہے۔ سیکرٹری ہاؤسنگ پنجاب نورالامین مینگل نے ایم ڈی ہارٹیکلچر ایجنسی لاہور احمد عثمان جاوید کو شہر کی خوبصورتی، گرین انفراسٹرکچر اور ماحولیاتی بہتری کے لیے جامع منصوبہ بندی کا خصوصی ٹاسک سونپ دیا۔ترجمان محکمہ ہاؤسنگ پنجاب کے مطابق سیکرٹری ہاؤسنگ نے ہدایت کی کہ لاہور کی خوبصورتی، شجرکاری اور گرین بیلٹس کی بہتری کے لیے جدید اور مؤثر حکمت عملی اختیار کی جائے۔ انہوں نے کہا کہ ہارٹیکلچر کے شعبے میں جدید تربیت، استعدادِ کار میں اضافہ اور افرادی قوت کی پیشہ ورانہ صلاحیتوں کو بہتر بنانے پر خصوصی توجہ دی جائے۔سیکرٹری ہاؤسنگ نورالامین مینگل نے نوجوان ہارٹیکلچر ماہرین کے لیے انٹرن شپ پروگرام شروع کرنے کی ہدایت دیتے ہوئے کہا کہ نئی نسل کو جدید ہارٹیکلچر، لینڈ اسکیپنگ اور شہری ماحولیات کے شعبوں میں عملی تربیت فراہم کی جائے تاکہ مستقبل کی ضروریات کے مطابق ماہر افرادی قوت تیار ہو سکے۔انہوں نے ہدایت کی کہ ہارٹیکلچر ایجنسی کی مشینری اور آلات کو جدید اور ڈیجیٹل ٹیکنالوجی سے آراستہ کیا جائے تاکہ شہری باغبانی، گرین بیلٹس اور پارکس کی دیکھ بھال مزید مؤثر انداز میں کی جا سکے۔ انہوں نے واسا لاہور کے اشتراک سے لوئر گرین بیلٹس منصوبے پر تیز رفتار عملدرآمد کی بھی ہدایت جاری کی۔سیکرٹری ہاؤسنگ نے کہا کہ شہر کی خوبصورتی کے لیے سادہ، مؤثر اور اسمارٹ انجینئرنگ و ڈیزائن سلوشنز اپنائے جائیں جبکہ فائبر اور پلاسٹک کے بجائے قدرتی اور ماحول دوست آرائشی میٹریل کے استعمال کو فروغ دیا جائے تاکہ ماحول دوست اور پائیدار شہری ترقی کو یقینی بنایا جا سکے۔نورالامین مینگل نے کہا کہ وزیراعلیٰ پنجاب مریم نواز شریف کے وژن کے مطابق لاہور کو سرسبز، پائیدار اور ماحول دوست شہر بنانے کے لیے مربوط حکمت عملی پر عملدرآمد کیا جا رہا ہے۔ جدید مشینری، تربیت یافتہ افرادی قوت، جدید ٹیکنالوجی اور مؤثر منصوبہ بندی کے ذریعے شہری ماحول کو مزید بہتر بنایا جائے گا اور لاہور کی خوبصورتی، شجرکاری اور ماحولیاتی معیار میں نمایاں بہتری لائی جائے گی۔
لاہور کو ماڈل ہارٹیکلچر سٹی بنانے کا فیصلہ،سیکرٹری ہاؤسنگ نے ایم ڈی ہارٹیکلچر ایجنسی لاہور کو جامع گرین انفراسٹرکچر پلان تیار کرنے کا خصوصی ٹاسک سونپ دیا
