*آزاد کشمیر الیکشن میں عوام نے پنجاب کی کارکردگی کو ووٹ دیا ہے۔ وزیر ہاؤسنگ پنجاب*

وزیر ہاؤسنگ اینڈ اربن ڈویلپمنٹ پنجاب بلال یاسین نے حلقے میں کھلی کچہری لگائی جس میں سائلین کی بڑی تعداد نے شرکت کی۔ صوبائی وزیر بلال یاسین نے شہریوں کے مسائل سنے، متعلقہ محکموں اور افسران کو فوری احکامات جاری کیے۔ اہلیان حلقہ نے مسائل کے تدارک،سڑکوں،گلیوں کی تعمیر اور سہولیات کی فراہمی پر صوبائی وزیر بلال یاسین کا شکریہ ادا کیا۔ اس موقع پر ان کا کہنا تھا کہ آزاد کشمیر الیکشن میں عوام نے پنجاب کی کارکردگی کو ووٹ دیا ہے۔ ہم فخر سے اپنی کارکردگی کا نعرہ لگاتے ہیں، کوئی دوسرا بھی کارکردگی کی بات کرے۔ انشاء اللہ وزیر اعلیٰ پنجاب اور انکی ٹیم بھرپور محنت سے پنجاب کی کارکردگی کو مثالی بنائے گی۔ وزیر ہاؤسنگ بلال یاسین نے واضح کیا کہ خدمت کی سیاست ہمارا عزم، دنیا پنجاب میں ترقی کے نئے ریکارڈ بنتا دیکھے گی۔ میرا حلقہ انتخاب اولین ترجیح،عمر بھر آپ لوگوں کی خدمت کیلئے توانائیاں صرف کرتا رہوں گا۔ اللہ تعالیٰ کے فضل اور میاں نواز شریف کی بھرپور حمایت سے آپ کیلئے جدید سہولیات کی فراہمی کیلئے ہر ممکن وسائل استعمال کیے جارہے ہیں۔ شہریوں کی خدمت اور ان کی دہلیز پر مسائل کا حل مسلم لیگ ن کی پالیسی ہے۔