محکمہ اوقاف کے زیر اہتمام خاتم النبیین ﷺ یونیورسٹی میں صوبائی سیرت النبی ﷺ کانفرنس کا انعقاد کیا گیا۔ صوبائی سیرت النبی ﷺ کانفرنس میں وزیر ہاؤسنگ اینڈ اربن ڈویلپمنٹ پنجاب بلال یاسین، سیکرٹری اوقاف ڈاکٹر احسان بھٹہ، چیئرمین مرکزی رویت ہلال کمیٹی مولانا سیّد عبد الخبیر آزاد ،خطیب داتا دربار مولانا مختار احمد ندیم اور دیگر علماء نے شرکت کی۔ اس موقع پر صوبائی وزیر بلال یاسین نے اظہار خیال میں کہا کہ حضور اکرم ﷺ کی ذاتِ اقدس پوری انسانیت کیلئے رحمت، ہدایت اور بہترین نمونہ ہے۔ سیرت النبی ﷺ کا مطالعہ صرف ایک مذہبی فریضہ نہیں بلکہ ہماری انفرادی اور اجتماعی زندگی کو سنوارنے کا ذریعہ بھی ہے۔ نبی کریم ﷺ نے ہمیں محبت، اخوت، برداشت، عدل، دیانت اور انسانیت کی خدمت کا درس دیا۔ نوجوان نسل ایک مضبوط اور خوشحال معاشرے کیلئے اپنے معاملات میں سچائی، انصاف اور امانت داری کو ترجیح دیں۔ ہمیں سیرت طیبہ کو صرف تقریبات اور محافل تک محدود نہیں رکھنا بلکہ اپنی عملی زندگی کا حصہ بنانا ہے۔ سیکرٹری اوقاف پنجاب ڈاکٹر احسان بھٹہ نے کہا کہ نبی کریم ﷺ نے انسانوں کے درمیان رنگ، نسل اور نسب کے امتیازات ختم کیا ۔ آپﷺ نے یتیموں، مسکینوں، بیواؤں اور کمزور طبقات کی خبرگیری کو معاشرتی ذمہ داری بنایا۔ آپ ﷺ کی سیرتِ طیبہ قرآنِ کریم کی عملی تفسیر اور پوری انسانیت کے لیے کامل ترین نمونہ حیات ہے۔ ڈاکٹر راغب حسین نعیمی،صدر متحدہ علماء بورڈ، چیئرمین مرکزی رویت ہلال کمیٹی مولانا عبدالخبیر آزاد اور دیگر علمائے کرام نے اظہار خیال کرتے ہوئے کہا کہ آپ ﷺ نے حقوق اللہ کے ساتھ حقوق العباد کی بھی اہمیت اُجاگر فرمائی۔ ہمیں فرقہ واریت، نفرت اور تعصب سے بالاتر ہو کر پاکستان کی ترقی اور استحکام کیلئے متحد ہونا ہوگا۔ کانفرنس میں ایڈیشنل سیکرٹری نبیلہ جاوید ، ڈی جی مذہبی امور حافظ انیس الرحمن، علمائے کرام، سیرت نگاروں، سکالرز، محققین، علماء، مشائخ، اکابرِ علمی و دینی شخصیات و مندوبین کثیر تعداد میں شریک تھے۔
*محکمہ اوقاف کے زیر اہتمام خاتم النبیین ﷺ یونیورسٹی میں صوبائی سیرت النبی ﷺ کانفرنس کا انعقاد*
