عید میلاد النبی ﷺ کے بابرکت موقع پر پنجاب کے مختلف شہروں میں ہارٹیکلچر ایجنسیوں کی جانب سے خصوصی تزئین و آرائش اور سجاوٹ کے انتظامات کیے گئے ہیں۔ لاہور سمیت سرگودھا، بہاولپور، سیالکوٹ، گوجرانوالہ اور دیگر اضلاع کی اہم شاہراہوں، گرین بیلٹس اور عوامی مقامات کو خوبصورتی سے سجایا گیا ہے۔عید میلاد النبی ﷺ کی مناسبت سے اہم شاہراہوں اور عوامی مقامات پر خصوصی لائٹنگ اور برقی قمقموں کا اہتمام کیا گیا، جس سے شہروں میں جشنِ میلاد النبی ﷺ کے حوالے سے خوبصورت اور پُروقار مناظر دیکھنے کو مل رہے ہیں۔ہارٹیکلچر ایجنسیوں کی جانب سے شہری خوبصورتی اور تزئین و آرائش کے لیے خصوصی اقدامات کیے گئے ہیں، جبکہ گرین بیلٹس اور اہم مقامات کو بھی برقی روشنیوں سے مزین کیا گیا ہے تاکہ شہریوں کو خوشگوار ماحول فراہم کیا جا سکے۔سیکرٹری ہاؤسنگ پنجاب نورالامین مینگل نے کہا کہ حضرت محمد ﷺ کی ولادتِ باسعادت کا دن امتِ مسلمہ کے لیے باعثِ رحمت ہے۔ سیرت النبی ﷺ ہمیں خدمت، اخلاص اور انسانیت کی بھلائی کا درس دیتی ہے۔انہوں نے کہا کہ دینی تعلیمات کے مطابق عوام الناس کو خوشگوار اور پُرامن ماحول فراہم کرنا حکومت کی ترجیحات میں شامل ہے۔ ہارٹیکلچر ادارے شہری خوبصورتی اور عوامی سہولیات کی بہتری کے لیے اپنی ذمہ داریاں بھرپور انداز میں ادا کر رہے ہیں۔نورالامین مینگل نے مزید کہا کہ عید میلاد النبی ﷺ کے موقع پر شہریوں کے لیے خوبصورت، پُروقار اور خوشگوار ماحول کی فراہمی کے لیے تمام متعلقہ ادارے اپنی ذمہ داریاں احسن انداز میں انجام دے رہے ہیں۔
