میئر کراچی بیرسٹر مرتضیٰ وہاب نے محکمہ موسمیات کی جانب سے آج سے 16 ستمبر تک بارش کی پیش گوئی کے پیش نظر بلدیہ عظمیٰ کراچی سمیت تمام متعلقہ بلدیاتی اداروں اور محکموں کو الرٹ رہنے اور بارش کے دوران شہریوں کو ہر ممکن سہولیات کی فراہمی یقینی بنانے کی ہدایت کی ہے، انہوں نے کہا کہ برسات کے دوران محکمہ میونسپل سروسز،محکمہ انجینئرنگ اور متعلقہ محکموں کا عملہ فیلڈ میں موجود رہے گا اور شہر میں کسی بھی ہنگامی صورتحال سے فوری طور پر نمٹنے کے لیے تمام ضروری انتظامات مکمل رکھے جائیں،میئر کراچی بیرسٹر مرتضیٰ وہاب نے کہا کہ محکمہ موسمیات کی جانب سے کراچی میں 16 ستمبر تک بارش کی پیش گوئی کی گئی ہے، اس لیے تمام متعلقہ ادارے اور محکمے مکمل طور پر الرٹ رہیں اور بارش کے دوران اپنے فرائض کی انجام دہی میں کسی قسم کی غفلت کا مظاہرہ نہ کریں، انہوں نے کہا کہ شہر کے چوکنگ پوائنٹس اور نالوں پر بارش کے پانی کی نکاسی کے لیے پمپس پہنچا دیئے گئے ہیں جبکہ مختلف حساس مقامات پر عملہ بھی ضروری مشینری اور آلات کے ساتھ موجود رہے گا،انہوں نے کہا کہ قلندریہ، زہری ہاؤس، حب ریور روڈ اور دیگر مقامات پر عملے کو کسی بھی ہنگامی صورتحال سے نمٹنے کے لیے تیار رکھا گیا ہے۔ بارش کے دوران سڑکوں اور نشیبی علاقوں سے پانی کی نکاسی کے عمل کی مسلسل نگرانی کی جائے گی تاکہ شہریوں کو مشکلات کا سامنا نہ کرنا پڑے، میئر کراچی نے کہا کہ بلدیہ عظمیٰ کراچی کے ساتھ ساتھ واٹر کارپوریشن اور سالڈ ویسٹ کا عملہ بھی فیلڈ میں موجود رہے گا اور بارش کے دوران متعلقہ ادارے باہمی رابطے کے ساتھ اپنی ذمہ داریاں انجام دیں گے،میئر کراچی بیرسٹر مرتضیٰ وہاب نے کہا کہ بلدیہ عظمیٰ کراچی نے اس سے قبل بھی برسات کی صورتحال کو بہتر انداز میں ہینڈل کیا اور اس مرتبہ بھی تمام دستیاب وسائل بروئے کار لاتے ہوئے شہریوں کو ریلیف فراہم کیا جائے گا، انہوں نے کہا کہ گزشتہ تجربات سے فائدہ اٹھاتے ہوئے بارش کے دوران نکاسی آب اور دیگر بلدیاتی امور میں مزید بہتری لائی جائے گی،انہوں نے کہا کہ شہریوں کی شکایات کے فوری ازالے کے لیے مانیٹرنگ سیل تشکیل دیا جائے گا جو بارش کے دوران صورتحال کی نگرانی کرے گا اور شہریوں کی جانب سے موصول ہونے والی شکایات پر فوری کارروائی یقینی بنائی جائے گی، میئر کراچی نے واضح کیا کہ بارش کے دوران شہریوں کو ریلیف کی فراہمی میں کسی بھی قسم کی کوتاہی برداشت نہیں کی جائے گی اور تمام متعلقہ افسران و عملہ اپنی ذمہ داریاں پوری مستعدی کے ساتھ انجام دیں۔
