وزیر اعلیٰ گلگت بلتستان امجد حسین نے چیئرمین پاکستان پیپلز پارٹی بلاول بھٹو زرداری کی سالگرہ کے حوالے سے سکردو میں پارٹی سیکریٹریٹ میں منعقدہ تقریب سے خطاب کرتے ہوئے تمام جیالوں سمیت صدرِ مملکت آصف علی زرداری اور چیئرمین بلاول بھٹو زرداری کو مبارک باد پیش کی اور ان کے لیے نیک خواہشات کا اظہار کیا۔ وزیر اعلیٰ نے کہا کہ چیئرمین بلاول بھٹو زرداری کی گلگت بلتستان کے ساتھ محبت اور قربت منفرد اور مثال ہے۔ 7 جون کو ہم نے بغیر کسی سہارے کے، صرف بلاول بھٹو کی قیادت میں عوام کی عدالت کا رخ کیا تھا اور ہم گلگت بلتستان کے عوام کے تہہ دل سے مشکور ہیں جنہوں نے پاکستان پیپلز پارٹی پر اپنے کامل اعتماد کا اظہار کیا۔وزیر اعلیٰ نے کہا کہ پچھلے نو سالوں میں ہم نے مسلسل گلگت بلتستان کی بہتری اور فلاح کے بارے میں سوچا ہے، اور اب وقت آ گیا ہے کہ ان تدابیر پر عملی کام کیا جائے۔ تمام تر مشکل حالات کے باوجود ہم اپنے نظریے، منشور اور منزل پر ثابت قدم رہے۔ آج گلگت بلتستان کے عوام پیپلز پارٹی کی حکومت سے بہت سی امیدیں وابستہ کیے ہوئے ہیں کیونکہ یہ خالصتاً عوام کی اپنی حکومت ہے۔ پیپلز پارٹی واحد سیاسی جماعت ہے جس کے ادوارِ اقتدار میں حکومتی دروازے ہمیشہ عام عوام کے لیے کھلے رہتے ہیں۔انہوں نے اس عزم کا اعادہ کیا کہ وہ گلگت بلتستان کے تمام مسائل سے اچھی طرح واقف ہیں اور خطے کے تمام طبقات اور سیاسی جماعتوں کو ساتھ لے کر آگے بڑھیں گے۔ ان کا کہنا تھا کہ ہمارے سامنے سب سے بڑا چیلنج غربت، بے روزگاری اور بجلی کا بحران ہے۔ اگلے پانچ سالوں کے دوران ہم گلگت بلتستان کو ایک ماڈل صوبہ بنائیں گے اور یہاں معاشی انقلاب برپا کریں گے۔ یہ خطہ معدنی اور قدرتی وسائل سے مالا مال ہے، اور ہم ہر ممکن اقدام کے ذریعے یہاں کے عوام کی معیشت اور معیارِ زندگی کو بہتر بنائیں گے۔
