وزیر اعلیٰ پنجاب کی ہدایت پر صوبے کے 20 اضلاع میں 6,500 ایکڑ گرین ایریاز کو مزید بہتر اور خوبصورت بنانے کی تیاریاں شروع کر دی گئی ہیں۔ اس حوالے سے صوبائی وزیر ہاؤسنگ و اربن ڈویلپمنٹ بلال یاسین کی زیر صدارت ہارٹیکلچر ایجنسیز کی کارکردگی کا جائزہ اجلاس ہوا۔ سیکرٹری ہاؤسنگ نور الامین مینگل اور ڈی جی پی ایچ اے احمد عثمان جاوید نے ہارٹیکلچر ایجنسیز کے امور بارے تفصیلی بریفنگ دی۔ صوبائی وزیر بلال یاسین نے کہا کہ 20 ہارٹیکلچر ایجنسیز کے پاس مجموعی طور پر 6,500 ایکڑ گرین ایریا موجود ہے، جس کی بہتر نگہداشت اور خوبصورتی پر خصوصی توجہ دی جائے گی۔ انہوں نے کہا کہ نرسریوں کے معیار کو بھی مزید بہتر بنانا ازحد ضروری ہے۔ انہوں نے ہارٹیکلچر اور بیوٹیفیکیشن کیلئے روایتی طریقوں کی جگہ جدید مشینی نظام متعارف کرانے کی تجویز دی اور کہا کہ جدید ٹیکنالوجی کے ذریعے کام کی رفتار اور معیار میں بہتری لائی جا سکتی ہے۔ وزیر ہاؤسنگ بلال یاسین کا مزید کہنا تھا کہا کہ ہارٹیکلچر ایجنسیز کے پاس ریونیو بڑھانے کی وسیع گنجائش موجود ہے، اس لیے ریونیو وصولی کے عمل کو ڈیجیٹلائز کیا جائے۔ فوڈ سٹریٹس اور تفریحی سہولیات میں بہتری، پارکس کی میپنگ اور مشینری ٹریکنگ کے نظام کو بھی مزید مؤثر بنایا جائے گا۔
