وزیر ہاؤسنگ اینڈ اربن ڈویلپمنٹ پنجاب بلال یاسین کی زیر صدارت پنجاب ہارٹیکلچر اتھارٹی کی کارکردگی کا جائزہ اجلاس منعقد ہوا، جس میں صوبے کے دیگر شہروں کو لاہور کی طرز پر سرسبز، خوبصورت اور دیدہ زیب بنانے کے لیے اقدامات کا جائزہ لیا گیا۔ اجلاس میں ڈی جی پی ایچ اے احمد عثمان جاوید نے اتھارٹی کی موجودہ کارکردگی اور مستقبل کے مجوزہ منصوبوں کے حوالے سے بریفنگ دی، جبکہ 21 اضلاع کے مینیجنگ ڈائریکٹرز نے بذریعہ ویڈیو لنک شرکت کی۔صوبائی وزیر بلال یاسین نے کہا کہ وزیراعلیٰ پنجاب مریم نواز شریف کی ہدایت پر صوبے کے تمام شہروں کی خوبصورتی میں اضافے اور شہریوں کو بہتر ماحول فراہم کرنے کے لیے عملی اقدامات کیے جا رہے ہیں۔ دیگر اضلاع میں پنجاب ہارٹیکلچر اتھارٹیز کی استعداد کار بڑھانے کے لیے ملازمین بھرتی کیے جائیں گے، جبکہ رواں مالی سال کے دوران 1289 نئی گاڑیاں اور مشینری خرید کر مختلف اضلاع کو فراہم کی جائیں گی۔بلال یاسین نے کہا کہ پارکس، گرین بیلٹس اور دیگر ہارٹیکلچر منصوبوں کی مؤثر دیکھ بھال اور آپریشن اینڈ مینٹی نینس کے لیے اربوں روپے کا بجٹ مختص کیا گیا ہے۔ انہوں نے ہدایت کی کہ ہارٹیکلچر کے نظام کو جدید خطوط پر استوار کرنے کے ساتھ ساتھ بزنس ماڈل کے ذریعے ریونیو کولیکشن پر بھی خصوصی توجہ دی جائے۔ صوبائی وزیر نے مزید ہدایت کی کہ نرسریوں، گاڑیوں اور مشینری کے ڈیٹا کی ڈیجیٹل مانیٹرنگ کے لیے ڈیش بورڈ کو مؤثر انداز میں استعمال کیا جائے تاکہ وسائل کے استعمال میں شفافیت، کارکردگی میں بہتری اور منصوبوں کی نگرانی کو یقینی بنایا جا سکے۔اجلاس میں اس عزم کا اظہار کیا گیا کہ پنجاب کے تمام اضلاع میں ہارٹیکلچر کے شعبے کو مستحکم بنانے، شہری ماحول کو بہتر کرنے اور عوامی مقامات کو سرسبز و خوبصورت بنانے کے لیے مربوط حکمت عملی کے تحت اقدامات جاری رکھے جائیں گے۔
*پی ایچ اے کی استعداد کار بڑھانے کیلئے دیگر اضلاع میں ملازمین بھرتی کئے جائیں گے،وزیر ہاؤسنگ پنجاب*
