"اردو ہے مرا نام میں خسروؔ کی پہیلی” اس لاجواب نظم کے تخلیق کار جناب اقبال اشہرؔ دورِ حاضر کی اردو شعر و شاعری اور مشاعروں کی محفل کا ایک معتبر نام ہیں۔
آپ 26/ اکتوبر 1965ء کو ہندوستان کے پایہ تخت شہر دلی میں پیدا ہوئے ، اقبال اشہر دور حاضر کے ان شعراء میں شمار ہوتے ہیں جنھوں نے غزل کو تازگی اور شگفتگی بخشی ہے اور اپنی پیاری پیاری غزلوں کے ساتھ ملک اور ملک سے باہر مشاعروں کو کامیاب بنانے میں اپنی ایک الگ شناخت قائم کی ہے ، شستہ ، شائستہ آسان پیرایۂ بیان اور اس پر مدھم سے ترنم کے ساتھ سلیس لہجہ آپ کو بس سنتے ہی رہنے کا اشتیاق دلاتا ہے ، "دھنک ترے خیال کی” آپ کا مجموعۂ کلام شائع ہو کر دادِ تحسین حاصل کر چکا ہے۔
آپ کے گھر میں امروہہ کے استاد شاعر رؤف امروہی کی نعتیہ شاعری کا مجموعہ تھا اسی کی بدولت نعتیہ کلام پڑھنے کا شوق پیدا ہوا ۔ رمضان کے مہینے میں ٹیپ ریکارڈر پر گھر گھر سنی جانے والی نعتوں نے بھی نعت گوئی کی خواہش کو جلا بخشی۔
دسویں جماعت میں شاعری کا آغاز ہوا ۔ اسی برس پہلی بار سترہ سال کی عمر میں آپ نے پہلی نعت پاک بھی کہی اور ایک سیرت کے جلسے میں پڑھی۔ پہلی نعت کے دو شعر ملاحظہ فرمائیں-
اللہ یہ دعا ہے مدینے کو جاؤں میں
ہے التجا بس اتنی کہ واپس نہ آؤں میں
آپ نے پہلا نعتیہ مشاعرہ دہلی کی جامع مسجد میں 1986 ءمیں پڑھا۔ اسکے بعد دہلی ، لکھنئو کانپور، رائے پور کے علاوہ بھارت کے دگر صوبوں اور شہروں کے نعتیہ مشاعروں میں بھی آپ نے اپنے نعتیہ کلام سے عاشقان رسول کو متاثر کیا۔
آپ کا پہلا مجموعہ (دھنک ترے خیال کی) دو شعری انتخابات (رت جگے) اور (غزل سرائے) کے نام سے شائع ہو چکے ہیں ۔علاوہ ازیں دیو ناگری میں بھی ایک شعری مجموعہ شائع ہو چکا ہے جس کا نام ہے (اردو ہے میرا نام )
اقبال اشہرؔ کے منتخب کلام
1۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اردو ہے مرا نام میں خسروؔ کی پہیلی
میں میؔر کی ہم راز ہوں غالبؔ کی سہیلی
دکن میں ولیؔ نے مجھے گودی میں کھلایا
سوداؔ کے قصیدوں نے مرا حسن بڑھایا
ہے میؔر کی عظمت کہ مجھے چلنا سکھایا
میں داغؔ کے آنگن میں کِھلی بن کے چمیلی
اردو ہے مرا نام میں خسروؔ کی پہیلی
میں میؔر کی ہم راز ہوں غالبؔ کی سہیلی
غالبؔ نے بلندی کا سفر مجھ کو سکھایا
حالیؔ نے مروت کا سبق یاد دلایا
اقبالؔ نے آئینۂ حق مجھ کو دکھایا
مومنؔ نے سجائی میرے خوابوں کی حویلی
اردو ہے مرا نام میں خسروؔ کی پہیلی
میں میؔر کی ہم راز ہوں غالبؔ کی سہیلی
ہے ذوقؔ کی عظمت کہ دئیے مجھ کو سہارے
چکبستؔ کی الفت نے مرے خواب سنوارے
فانیؔ نے سجائے مری پلکوں پہ ستارے
اکبرؔ نے رچائی میری بے رنگ ہتیلی
اردو ہے مرا نام میں خسروؔ کی پہیلی
میں میؔر کی ہم راز ہوں غالبؔ کی سہیلی
کیوں مجھ کو بناتے ہو تعصب کا نشانہ
میں نے تو کبھی خود کو مسلماں نہیں مانا
دیکھا تھا کبھی میں نے بھی خوشیوں کا زمانہ
اپنے ہی وطن میں ہوں مگر آج اکیلی
اردو ہے مرا نام میں خسروؔ کی پہیلی
میں میؔر کی ہم راز ہوں غالبؔ کی سہیلی
2۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ٹھہری ٹھہری سی طبیعت میں روانی آئی
آج پھر یاد محبت کی کہانی آئی
آج پھر نیند کو آنکھوں سے بچھڑتے دیکھا
آج پھر یاد کوئی چوٹ پرانی آئی
مدتوں بعد چلا ان پہ ہمارا جادو
مدتوں بعد ہمیں بات بنانی آئی
مدتوں بعد پشیماں ہوا دریا ہم سے
مدتوں بعد ہمیں پیاس چھپانی آئی
مدتوں بعد کھلی وسعت صحرا ہم پر
مدتوں بعد ہمیں خاک اڑانی آئی
مدتوں بعد میسر ہوا ماں کا آنچل
مدتوں بعد ہمیں نیند سہانی آئی
اتنی آسانی سے ملتی نہیں فن کی دولت
ڈھل گئی عمر تو غزلوں پہ جوانی آئی
3۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمہاری خوشبو تھی ہم سفر تو ہمارا لہجہ ہی دوسرا تھا
یہ عکس بھی آشنا سا ہے کچھ مگر وہ چہرہ ہی دوسرا تھا
وہ ادھ کھلی کھڑکیوں کا موسم گزر گیا تو یہ راز جانا
ادھر شناسائی تک نہیں تھی ادھر تقاضا ہی دوسرا تھا
گلاب کھلتے تھے چاہتوں کے چراغ جلتے تھے آہٹوں کے
جہاں برستی ہیں وحشتیں اب کبھی وہ رستہ ہی دوسرا تھا
کبھی نہ کہتا تھا دل ہمارا کہ آنسوؤں کو لکھیں ستارہ
جدائیوں کی کسک سے پہلے یہ استعارہ ہی دوسرا تھا
اداس لفظوں کے راستے میں یہ روشنی کی لکیر کب تھی
محبتوں کے سفر سے پہلے غزل کا لہجہ ہی دوسرا تھا
4۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اُس کی خوشبو مری غزلوں میں سمٹ آئی ہے
نام کا نام ہے رسوائی کی رسوائی ہے
دل ہے اک اور دو عالم کا تمنائی ہے
دوست کا دوست ہے ہرجائی کا ہرجائی ہے
ہجر کی رات ہے اور اُن کے تصور کا چراغ
بزم کی بزم ہے تنہائی کی تنہائی ہے
کون سے نام سے تعبیر کروں اس رُت کو
پھول مرجھائے ہیں زخموں پہ بہار آئی ہے
کیسی ترتیب سے کاغذ پہ گرے ہیں آنسو
ایک بھولی ہوئی تصویر اُبھر آئی ہے
4۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
