وزیر اعلیٰ خیبر پختونخوا علی امین خان گنڈاپور نے لیڈی ریڈنگ ہسپتال کا دورہ کیا۔وزیراعلی نے ہسپتال میں زیر علاج سانحہ ڈی چوک کے زخمیوں کی عیادت کی۔ صوبائی وزیر پختون یار اور مشیر اطلاعات بیرسٹر محمد علی سیف بھی وزیراعلی کے ہمراہ تھے۔ ہسپتال کے متعلقہ حکام بھی اس موقع پر موجود تھے۔ وزیراعلی نے زیر علاج زخمیوں کو علاج معالجے کی سہولیات بارے دریافت کیا اور ہسپتال انتظامیہ کو زخمیوں کو علاج معالجے کی بہترین سہولیات یقینی بنانے کی ہدایت کی۔وزیر اعلٰی علی امین گنڈاپور نے اس موقع پر کہا کہ سانحہ ڈی چوک میں جاں بحق ہونے والے کارکنان کی قربانیاں رائیگاں نہیں جائیں گی، سانحہ ڈی چوک میں حکومتی ظلم و تشدد کا شکار ہونے والے کارکنان کے حوصلوں اور جذبوں کو سلام پیش کرتا ہوں۔زخمی اور جاں بحق ہونے والے ان کارکنوں کا جذبہ دوسرے کارکنان کے لئے مشعل راہ ہے، جاں بحق کارکنان کے لواحقین اور زخمیوں کو تنہا نہیں چھوڑا جائے گا اور انہیں مکمل سپورٹ فراہم کی جائے گی۔
