خیبر پختونخوا کو این ایف سی میں ضم اضلاع کا شئیر نہیں مل رہا، اے آئی پی کے تحت منصوبوں کے فنڈز بھی باقاعدگی سے نہیں مل رہے،علی امین گنڈاپور

وزیر اعلٰی خیبر پختونخوا علی امین گنڈاپور نے محسود ویلفیئر ایسوسی ایشن کے تحت ٹیلنٹ ایوارڈ کی تقریب میں بحیثیت مہمان خصوصی شرکت کی اور خطاب کیا ۔ علی امین گنڈاپور نے کہا کہ صوبے بشمول ضم اضلاع میں دیرپا امن کا قیام صوبائی حکومت کی سب سے اہم ترجیح ہے، قبائلی اضلاع کے لوگوں نے ملک کےلئے بڑی قربانیاں دی ہیں، یہ لوگ اپنا گھر بار چھوڑ کر نقل مکانی پر مجبور ہوئے۔نقل مکانی اور دوبارہ آباد کاری کے دوران ان لوگوں نے بڑی تکالیف برداشت کیں لیکن بدقسمتی سے حکومتی سطح پر ان کی قربانیوں کا اعتراف نہیں ہوا، جب حکومت اپنے لوگوں کے ساتھ کئے وعدے پورے نہیں کرتی تو لوگوں کا حکومت پر اعتماد ختم ہو جاتا ہے، ضم اضلاع کے لوگوں کے اعتماد کی بحالی کے لئے حکومت ان کے ساتھ کئے گئے وعدے پورے کرے۔ قبائلی عوام بڑے جرات مند اور ملک سے محبت کرنے والے ہیں، قبائلی عوام نہ جھکتے ہیں، نہ بکتے ہیں اور نہ کسی کی غلامی قبول کرتے ہیں، یہ اپنے اصولوں اور روایات کے پابند ہیں، یہی وجہ ہے کہ مشکل ترین صورتحال سے گزرنے کے باوجود دوبارہ اپنے پاؤں پر کھڑا ہونے کی ہمت رکھتے ہیں علی امین گنڈاپور نے کہا کہ دہشت گردی کے خلاف آپریشن میں وزیرستان کے لوگوں کا بہت جانی و مالی نقصان ہوا، اس کے باوجود اپنی قوم کو اٹھانے اور فلاحی سرگرمیوں کا جذبہ قابل تحسین ہے، مرکز میں پی ٹی آئی کی حکومت کے خاتمے کے بعد ملک میں امن وامن کی صورتحال خراب ہوئی ہے۔جب ہم نے صوبے میں حکومت سنبھالی تو صورتحال کافی خراب تھی، ہم صورتحال کو بہتر بنانے کے لئے شروع دن سے سنجیدہ اقدامات اٹھا رہے ہیں، موجودہ صوبائی حکومت ضم اضلاع کی ترقی اور ان کے مسائل کے حل کےلئے ہر ممکن اقدامات کر رہی ہے۔ ہم وفاق سے ضم اضلاع کے آئینی حقوق کے حصول کے لیے شروع دن سے آواز اٹھا رہے ہیں، صوبائی حکومت کو این ایف سی میں ضم اضلاع کا شئیر نہیں مل رہا۔ دوسری طرف اے آئی پی کے تحت منصوبوں کے فنڈز بھی باقاعدگی سے نہیں مل رہے، صوبائی حکومت اپنے وسائل سے ضم اضلاع میں ترقیاتی منصوبوں پر عملدرآمد کررہی ہے۔ہم نے مسلسل کوشش کے ذریعے این ایف سی شیئر کا مسئلہ ایجنڈے میں شامل کروا دیا ہے، این ایف سی میں ضم اضلاع کے شیئرز مل جائیں تو علاقے کے بہت مسائل حل ہو جائیں گے، وزیرستان ایجوکیشن سٹی کے منجمد منصوبے کو بحال کرکے اس پر مرحلہ وار عملدرآمد کیا جائے گا۔وزیر اعلٰی کا محسود ویلفیئر ایسوسی ایشن کے لئے دو کروڑ روپے گرانٹ کا اعلان،وزیر اعلٰی نےوانا ویلفیئر فاؤنڈیشن کے لئے بھی ایک کروڑ روپے گرانٹ کا اعلان کیا ۔وزیر اعلٰی نے ساوتھ وزیرستان اپر میں ایک نئے سب ڈویژن کے قیام کے مطالبے سے اصولی اتفاق کیا۔صوبائی حکومت ضم اضلاع میں اس طرح کی دیگر فلاحی تنظیموں کی بھی بھر پور معاونت کرے گی،

تقریب میں وزیراعلٰی علی امین گنڈاپور نے مختلف تعلیمی میدان میں نمایاں کارکردگی کا مظاہرہ کرنے والے ہونہار طلبہ میں ایوارڈز اور نقد انعامات تقسیم کیے، وزیرستان سے اراکین قومی و صوبائی اسمبلی، محسود ویلفیئر ایسوسی ایشن کے عہدیداروں، قبائلی عمائدین اور ہونہار طلبا و طالبات نے تقریب میں شرکت کی۔