پاکستان مسلم لیگ (ن) کے صدر و سابق وزیر اعظم محمد نوازشریف سے سب بڑی عالمی کرپٹو کرنسی ایکسچینج بائنانس کے سابق سی ای او اور بانی چانگ پنگ ژاؤنے ملاقات کی۔ وزیراعلیٰ پنجاب مریم نوازشریف اورپاکستان کرپٹو کونسل کے سی ای او بلال بن ثاقب بھی موجود تھے۔
قائد محمد نواز شریف اور وزیراعلیٰ مریم نواز شریف نے چانگ پنگ ژاؤکی پاکستان کرپٹو کونسل کے سٹریٹجک ایڈوائزر کے طورپر تقرری کا خیر مقدم کیا۔ قائد محمد نوازشریف اور وزیراعلیٰ مریم نواز شریف نے چانگ پنگ ژاؤکے تقررکو ویب تھری اور ڈیجیٹل فنانس میں ریجنل ہب کے طور پر پاکستان کی شناخت کے اظہار کے لئے معاون اقدام قراردیا ہے۔ ملاقات میں ملک میں ڈیجیٹل اکانومی پر تبادلہ خیال کیا گیا۔ اس موقع پر اختراعی علوم کے ذریعے ترقی کے ویژن کو اپنانے اورڈیجیٹل ٹرانسفارمیشن کے لئے جدید علوم کے رجحانات کے فروغ پر اتفاق کیا گیا۔بائنانس کے بانی نے پاکستان میں تین مرتبہ وزیر اعظم رہنے والے مسلم لیگ (ن)کے قائد محمد نوازشریف کے ایمرجنگ ٹیکنالوجیز کے فروغ کے وژن کو خراج تحسین پیش کیا۔ ملاقات میں ڈیجیٹل اثاثہ جات اور فیوچرٹیکنالوجی میں نوجوانوں کی شراکت کے امور پر بھی تفصیلی گفتگو کی گئی۔ چانگ پنگ ژاؤ نے ابھرتی بلاک چین ٹیکنالوجی اورگلوبل انٹر پرینیور شپ کے امکانات سے آگاہ کیا۔ قائد محمد نوازشریف نے کہا کہ مسٹر ژ اؤ جیسی قابل قدر شخصیات سے ملاقات میں ترقی اور مواقع کی نئی راہیں ہموار ہوتی ہیں۔پاکستان اختراعی تبدیلیوں کا شراکت دار بننے کے لئے تیار ہے۔ پاکستان کو دورجدید کے تقاضوں کے مطابق تیز ی سے بدلتی ہوئی ٹیکنالوجیز کو اپنانا ہوگا۔وزیراعلیٰ مریم نوازشریف نے کہا کہ نوجوانوں کو آئی ٹی سکلز سکھا کر عالمی ڈیجیٹل مارکیٹ کے لئے تیار کررہے ہیں۔ پنجاب مستقبل کی ٹیکنالوجیز کو اپنانے کے لئے بالکل تیار ہے۔وزیراعلیٰ مریم نوازشر یف نے کہا کہ ہماری پوری توجہ نالج بیسڈ ٹیکنالوجی پر مرکوز ہے۔ نالج بیسڈ ٹیکنالوجی نئی جنریشن کو اختراعی اور ڈیجیٹل انٹر پرائزز کی راہ گامزن کرے گی۔ بائنانس کے سی اوچانگ پنگ ژاؤ نے شاندار میزبانی پر مسلم لیگ(ن) قائد محمد نوازشریف کا شکریہ ادا کیا۔ چانگ پنگ ژاؤنے ڈیجیٹل علوم میں پاکستانی نوجوانوں کی صلاحیتو ں کو سراہا۔
