کمشنر لاہور زید بن مقصود نے عیدالفطر کے دوسرے روز چائلڈ پروٹیکشن بیورو شالیمار اور پنجاب انسٹیٹیوٹ آف مینٹل ہیلتھ ہسپتال کا دورہ کیا۔ کمشنر لاہور کو منتظمین و افسران چائلڈ پروٹیکشن بیورو نے خوش آمدید کہا۔ کمشنر لاہور چائلڈ پروٹیکشن بیورو میں مقیم بچوں کی عید کی خوشیوں میں شریک ہوئے، بچوں کے ہمراہ کیک کاٹا، عید کے تحائف اور کھلونے تقسیم کیے، انہوں نے چائڈ پرٹیکشن پنگھوڑے میں موجود بچوں کو پیار کیا۔
کمشنر لاہور نے کہا ہے کہ عید کے دن معصومیت اور محبت کے خوبصورت چہرے دیکھنے کو ملے، خوش قسمت ہوں کہ عید کا دن ان بچوں کے ساتھ گزارنے کا موقع ملا ہے، چائڈ پروٹیکشن بیورو کے منتظمین و افسران خاص طور پر تحسین کے قابل ہیں۔
بعد ازاں کمشنر لاہور نے عید مبارک کیلئے پنجاب انسٹیٹیوٹ آف مینٹل ہیلتھ ہسپتال کا بھی دورہ کیا۔ مینٹل ہسپتال آمد پر کمشنر لاہور کو ایم ایس مینٹل ہسپتال اور اے ایم ایس نے خوش آمدید کہا۔ کمشنر لاہور نے مینٹل ہسپتال میں زیر علاج ذہنی امراض میں مبتلا مرد و خواتین کو عید کی خوشیوں کی نسبت سے مٹھائی پیش کی اور عید کی مبارکباد دی، انہوں نے مختلف وارڈ کا دورہ کیا اور نگہداشت کیلئے موجود ڈاکٹرز، سٹاف کا پر خلوص شکریہ ادا کیا۔
کمشنر لاہور نے مریض خواتین کی پینٹنگز اور تخلیقات کو خراج تحسین پیش کرتے ہوئے کہا ہے کہ پنجاب انسٹیٹیوٹ آف مینٹل ہیلتھ ذہنی امراض میں مبتلا مریضوں کے علاج و بحالی کا سب سے بڑا مرکز ہے، آج کا دن اپنوں میں گزارنے کی بجائے ان مریضوں کی نگہداشت کیلئے قربان کرنے والوں کو سلام عقیدت ہے۔
