وزیراعلیٰ خیبر پختونخوا علی امین خان گنڈاپور کی زیر صدارت اجلاس، احساس اپنا گھر، احساس نوجوان، احساس ہنر اور احساس روزگار پروگراموں کا جائزہ

وزیراعلیٰ خیبر پختونخوا علی امین خان گنڈاپور کی زیر صدارت احساس پروگرام سے متعلق اجلاس منعقد ہوا ۔ اجلاس میں احساس امبریلا کے تحت مختلف پروگراموں پر عمل درآمد اور اب تک کی پیشرفت کا تفصیلی جائزہ لیا گیا ۔ ان پروگراموں میں احساس اپنا گھر، احساس نوجوان، احساس ہنر اور احساس روزگار شامل ہیں۔ متعلقہ اراکین صوبائی کابینہ کے علاوہ متعلقہ محکموں اور شراکت دار اداروں کے اعلیٰ حکام نے شرکت کی۔وزیر اعلیٰ کی متعلقہ انتظامی سیکرٹریز کو اپنے اپنے پروگراموں کی مکمل اونرشپ لینے کی ہدایت کی۔ ان پروگراموں پر عمل درآمد کی صورتحال کو مزید بہتر بنانے کے لئے متعلقہ محکموں کی سطح پر خصوصی ٹیمیں تشکیل دی جائیں، محکمے اپنے متعلقہ پروگراموں پر مقررہ ٹائم لائنز کے مطابق عملدرآمد اور پیشرفت یقینی بنائیں، ان پروگراموں کے تحت قرضوں کی فراہمی کے عمل کو تیز کیا جائے۔ علی امین گنڈاپور نے کہا کہ یہ صوبائی حکومت کے اہم فلاحی منصوبے ہیں، ان پر عمل درآمد میں تاخیر قابل قبول نہیں، سوشل میڈیا کے ذریعے ان پروگراموں کی بھر پور تشہیر کی جائے تاکہ ذیادہ سے ذیادہ لوگ ان سے مستفید ہوسکیں، ان پروگراموں میں صوبے کے تمام اضلاع کو آبادی کے تناسب سے کوٹہ دیا جائے، ان پروگراموں میں خواتین، خصوصی افراد، نوجوانوں اور خواجہ سراؤں سمیت تمام طبقات کی شمولیت کو یقینی بنایا جائے۔ متعلقہ حکام کی طرف سے پروگراموں پر عمل درآمد کے سلسلے میں اب تک کی پیش رفت پر بریفنگ دی گئی۔ بریفنگ میں بتایا گیا کہ احساس نوجوان پروگرام کے 2 مختلف کمپوننٹس کا اجراء کر دیا گیا ہے، احساس نوجوان پروگرام کے پہلے مرحلے پر ایک ارب روپے کی لاگت سے بنک آف خیبر کے ذریعے عمل درآمد جاری ہے، پروگرام کے تحت قرضوں کے حصول کے لیے کل 9976 درخواستیں موصول ہوئی ہیں، اس مرحلے کے تحت اب تک نوجوانوں کے 47 کلسٹرز میں 11 کروڑ روپے تقسیم کیے جا چکے ہیں، 120 کیسز چھان بین کے مراحل میں ہیں۔وزیر اعلیٰ کی پروگرام کے تحت کیسز پراسس کرنے کے عمل کو سادہ اور مختصر رکھنے کی ہدایت،علی امین گنڈاپور نے کہا کہ

اگلے ایک ہفتے میں واضح پیش رفت نظر آنی چاہیے۔بریفنگ میں مزید بتایا گیا کہ احساس نوجوان پروگرام کا دوسرا مرحلہ 2 ارب روپے کی لاگت سے اخوت کے ذریعے لانچ کیا گیا ہے، اب تک پروگرام کے لیے 20 کروڑ روپے جاری کیے گئے جو سارے تقسیم کیے جا چکے ہیں، مختلف اضلاع سے 1390 مستحق افراد اس پروگرام کے تحت بلاسود قرضہ حاصل کر چکے ہیں، پروگرام کے تحت مزید 2600 درخواست گزاروں کو بلاسود قرضے فراہم کرنے کا عمل جاری ہے۔ وزیر اعلیٰ کی پروگرام کے لیے فوری طور پر مزید 20 کروڑ روپے جاری کرنے کی ہدایت کی۔بریفنگ کے مطابق احساس اپنا گھر پروگرام بنک آف خیبر کے تعاون سے لانچ کیا گیا ہے، پروگرام کے تحت درخواستوں کی وصولی کا عمل جاری ہے، اب تک مختلف اضلاع سے 14500 درخواستیں موصول ہوئی ہیں جن کی جانچ پڑتال جاری ہے۔احساس ہنر پروگرام کے تحت درخواستوں کی وصولی کے لیے آن لائن پورٹل کا اجراء کر دیا گیا ہے، پروگرام پر عمل درآمد کے لیے 20 کروڑ روپے جاری کیے گئے ہیں، احساس روزگار اسکیم 4 ارب روپے کی لاگت سے شروع کی جارہی ہے۔