پنجاب پلاننگ اینڈ ڈویلپمنٹ بورڈ نے مالی سال 2024-25 کے صوبائی ڈویلپمنٹ ورکنگ پارٹی کے 64 ویں اجلاس میں مختلف سیکٹرز کی 5 ترقیاتی سکیموں کے لیے مجموعی طور پر 31 ارب87کروڑ 48لاکھ 40ہزار روپے کے فنڈز کی منظوری دی۔ اجلاس کی صدارت چیئرمین پلاننگ اینڈ ڈویلپمنٹ بورڈ بیرسٹر نبیل احمد اعوان نے کی۔
صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں وزیر اعلیٰ پنجاب آسان کاروبار فنانس سکیم کیلئے 9 ارب 50کروڑ روپے، وزیر اعلیٰ پنجاب آسان کاروبار کارڈ کیلئے 9 ارب 50کروڑ روپے، لاہور میں پرانی پی اینڈ ڈی بلڈنگ میں ایڈمنسٹریٹو ٹاور A-کی تعمیر کیلئے 4ارب 32کروڑ 79لاکھ 36ہزار روپے، ملتان میں بوسان روڈ (سیدن والا چوک) تا ہیڈ محمد والا دو رویہ روڈ کی تعمیر (ترمیمی) کیلئے 1 ارب 63کروڑ 76لاکھ 3ہزا رروپے اور فیصل آباد سرکلر روڈ / بائی پاس رنگ کی بحالی (ترمیمی) کیلئے 6 ارب 90کروڑ 93لاکھ 3 ہزار روپے شامل ہیں۔
اجلاس میں صوبائی سیکرٹری پی اینڈ ڈی بورڈ ڈاکٹر آصف طفیل سمیت چیف اکانومسٹ محمد مسعود انور، متعلقہ سیکرٹریز، محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔
