صوبے میں سیلابی صورتحال کے تناظر میں متاثرین کی سہولت کے لیے خیبرپختونخوا حکومت نے ایک بڑا قدم اٹھایا ہے۔ متاثرین کو نقصانات کے معاوضوں کی آن لائن ادائیگی کے لئے خصوصی ایپ کا اجرا کیا گیا ہے۔ وزیر اعلیٰ خیبر پختونخوا علی امین گنڈاپور نے اس ڈیجیٹل پیمنٹ سسٹم کا باضابطہ افتتاح کیا۔”ڈیجیٹل ڈیزاسٹر کمپنسیشن مینجمنٹ” کے نام سے تیار کی گئی یہ ایپ خیبرپختونخوا آئی ٹی بورڈ نے قلیل وقت میں ہنگامی بنیادوں پر بنائی ہے۔ اسے صوبائی حکومت کی مرکزی سروس ڈیلیوری ایپ "دستک” کے ساتھ بھی منسلک کر دیا گیا ہے تاکہ عوام ایک ہی پلیٹ فارم سے سہولت حاصل کر سکیں۔
ایپ کے ذریعے سیلاب متاثرین اپنے تباہ شدہ املاک کے نقصانات کی تفصیلات اپ لوڈ کر کے براہ راست معاوضہ کلیم کر سکیں گے۔ متاثرہ افراد کو ان کے نقصانات کے معاوضے آن لائن اور شفاف طریقے سے ادا کیے جائیں گے۔ یہ سسٹم مکمل طور پر پیپر لیس اور کیش لیس ہے۔ایپ میں جیو ٹیگنگ کی سہولت شامل کی گئی ہے تاکہ کسی بھی قسم کی غلط معلومات یا جعلی کلیمز کو روکا جا سکے۔وزیر اعلٰی علی امین گنڈاپور نے کہا ہے کہ نقصانات اور معاوضوں کی ویری فکیشن بھی خودکار طریقے سے کی جائے گی جس سے شفافیت اور درستگی کو یقینی بنایا جا سکے۔یہ ایپ نہ صرف متاثرین کو بروقت معاوضے فراہم کرے گی بلکہ اس پورے عمل میں شفافیت بھی یقینی بنائے گی۔ انہوں نے قلیل مدت میں یہ ایپ تیار کرنے پر متعلقہ حکام کو خراج تحسین پیش کیا۔ وزیر اعلیٰ اور چیف سیکرٹری سمیت تمام حکام کے لیے ایک ڈیش بورڈ بھی بنایا گیا ہے جس پر تمام ادائیگیوں اور نقصانات کی تفصیلات دستیاب ہوں گی۔. علی امین گنڈاپور نے مزید کہا کہ متاثرین کو بروقت ریلیف اور سہولیات کی فراہمی صوبائی حکومت کی اولین ترجیح ہے۔ سیلاب زدگان کے لیے آن لائن ادائیگی کا یہ جدید نظام ایک اہم سنگ میل ہے جو عوامی فلاح اور اچھی حکمرانی کی طرف ایک بڑا قدم ہے۔
