حالیہ سیلاب سے شدید متاثر ہونے والا محمود آباد دنیور کا واٹر چینل بحال کر دیا گیا ہے۔متاثرہ چینل کی مکمل بحالی، معاون خصوصی برائے واٹر مینجمنٹ اینڈ ایریگیشن حسین شاہ کی ذاتی دلچسپی، مسلسل نگرانی اور وزیر اعلیٰ گلگت بلتستان کی ہدایات پر عملدرآمد کے باعث ممکن ہو سکا۔اس بحالی سے نہ صرف زرعی زمینوں کو پانی کی فراہمی ممکن ہو گئی ہے
بلکہ مقامی عوام کو پینے کے صاف پانی تک رسائی بھی بحال ہو گئی ہے۔ سیلاب کے باعث واٹر چینل کی بندش سے اہل علاقہ کو سخت مشکلات کا سامنا تھا، تاہم حکومت گلگت بلتستان نے فوری اقدامات اٹھاتے ہوئے بحالی کام کو ترجیحی بنیادوں پر مکمل کروایا۔معاون خصوصی حسین شاہ نے اس حوالے سے کہا ہے کہ وزیر اعلیٰ گلگت بلتستان کی قیادت میں ہم عوامی مسائل کے فوری حل کے لیے پرعزم ہیں۔ محمود آباد دنیور کے عوام کو درپیش مشکل کا ادراک رکھتے ہوئے ہم نے واٹر چینل کی بحالی کو ترجیح دی، اور آج الحمدللہ یہ چینل کامیابی سے مکمل ہو چکا ہے۔مقامی افراد اور عمائدین نے حکومت کے اس بروقت اقدام کو سراہتے ہوئے،وزیر اعلیٰ گلگت بلتستان، واٹر مینجمنٹ و ایریگیشن ڈیپارٹمنٹ کا شکریہ ادا کیا۔ انہوں نے امید ظاہر کی کہ اسی جذبے کے تحت دیگر ترقیاتی منصوبے بھی جلد مکمل ہوں گے۔
