سیکرٹری ہاؤسنگ پنجاب نورالامین مینگل نے تاجپورہ کا دورہ کیا اور وہاں جاری بارشی پانی کی نکاسی اور ڈی واٹرنگ آپریشن کا موقع پر جائزہ لیا۔ تاجپورہ میں کم وقت کے دوران 252 ملی میٹر بارش ریکارڈ کی گئی، جس کے باعث بارشی پانی کی نکاسی کے لیے واسا کی ٹیمیں تیزی سے آپریشن میں مصروف ہیں۔سیکرٹری ہاؤسنگ نورالامین مینگل نے ڈی واٹرنگ آپریشن کی خود نگرانی کی اور فیلڈ افسران کو ضروری ہدایات جاری کرتے ہوئے کہا کہ بارشی پانی کی فوری نکاسی کے لیے تمام دستیاب وسائل بروئے کار لائے جائیں اور نشیبی علاقوں سے پانی کی جلد از جلد نکاسی یقینی بنائی جائے۔انہوں نے کہا کہ 252 ملی میٹر کی غیر معمولی بارش کے باوجود واسا کی فیلڈ ٹیمیں مسلسل متحرک ہیں اور نکاسیٔ آب کا آپریشن پوری رفتار سے جاری ہے۔ انہوں نے متعلقہ افسران کو ہدایت کی کہ تمام مشینری کو مکمل استعداد کے ساتھ فعال رکھا جائے اور آپریشن میں کسی قسم کی رکاوٹ نہ آنے دی جائے۔سیکرٹری ہاؤسنگ نے تاجپورہ میں 32 لاکھ گیلن گنجائش کے انڈر گراؤنڈ واٹر ٹینک کا بھی دورہ کیا اور وہاں موجود انتظامات کا جائزہ لیا۔ انہوں نے پمپنگ مشینری اور فیلڈ عملے کی کارکردگی کا بھی معائنہ کیا اور ہدایت کی کہ بارشی پانی کی نکاسی کے لیے تمام ضروری اقدامات بلا تعطل جاری رکھے جائیں۔نورالامین مینگل نے کہا کہ شہریوں کو جلد از جلد ریلیف کی فراہمی حکومت پنجاب کی اولین ترجیح ہے۔ مون سون کے دوران تمام متعلقہ ادارے مکمل باہمی رابطہ کاری کے ساتھ فیلڈ میں متحرک ہیں اور شہریوں کو بروقت ریلیف فراہم کرنے کے لیے تمام ممکنہ وسائل بروئے کار لائے جا رہے ہیں۔
*سیکرٹری ہاؤسنگ نورالامین مینگل کا تاجپورہ کا دورہ، جاری نکاسیٔ آب آپریشن کا جائزہ*
