بادامی منڈی کے توسیعی و بحالی منصوبے کے لئے 27 کروڑ 60 لاکھ روپے کے فنڈز جاری کر دیئے گئے،ڈاکٹر کرن خورشید

سیکرٹری فوڈ سیفٹی اینڈ کنزیومر پروٹیکشن ڈاکٹر کرن خورشید نے بتایا ہے کہ بادامی باغ سبزی اور فروٹ منڈی کے توسیعی و بحالی منصوبے کے لیے 27 کروڑ 60 لاکھ روپے کی منظوری دے دی گئی ہے اور منصوبے کا ورک آرڈر جاری کر دیا گیا ہے-انہوں نے بتایا کہ اس منصوبے کی تکمیل کے لیے 30 ستمبر 2026 کی ڈیڈ لائن مقرر کی گئی ہے جبکہ منڈی میں آر سی سی سیوریج پائپ لائنز بچھانے کا کام مکمل ہو چکا ہے اور 40 فٹ چوڑی مرکزی آر سی سی سڑک کی بحالی کا 75 فیصد کام بھی مکمل کر لیا گیا ہے اس کے ساتھ ساتھ بادامی باغ منڈی کی 8 فٹ اونچی باؤنڈری وال کی تعمیر و تزئین کا 40 فیصد کام بھی مکمل ہو چکا ہے۔سیکرٹری فوڈ سیفٹی نے مزید بتایا کہ راوی منڈی میں 4 جدید گیٹس اور پلرز کی تعمیر کا 15 فیصد سے زائد کنسٹرکشن ورک ہو چکا ہے اور پیدل چلنے کے راستوں اور پارکنگ ایریا میں ٹف پیور بچھانے کا 20 فیصد کام مکمل کر لیا گیا ہے۔ڈاکٹر کرن خورشید نے بتایا کہ منڈی کے نالوں کی صفائی اور ان پر سلیبز ڈالنے کا کام 25 فیصد سے زائد مکمل ہو چکا ہےاور سبزی منڈی کے ذیلی دفتر کی عمارت کی تعمیر تکمیل کے مراحل میں ہے ۔سیکرٹری فوڈ سیفٹی نے مزید بتایا کہ راوی سبزی منڈی میں 70 جدید ایل ای ڈی سٹریٹ لائٹس نصب کرنے کا کام بھی جلد شروع کیا جائے گا، جس سے منڈی میں روشنی کے مسائل حل ہوں گے۔انہوں نے کہا کہ منصوبہ مقررہ وقت پر مکمل ہونے سے سبزی و پھل منڈی جدید سہولتوں سے آراستہ ہو جائے گی جس سے تاجروں اور خریداروں کو آسانی ہوگی۔