پرائس کنٹرول مجسٹریٹس کی ایک ہفتہ میں88 ہزار سے زائد انسپکشنز55لاکھ66 ہزار جرمانہ-سیکرٹری فوڈ سیفٹی

سیکرٹری فوڈ سیفٹی اینڈ کنزیومر پروٹیکشن ڈاکٹرکرن خورشید نے بتایا کہ صوبہ بھر میں پرائس کنٹرول مجسٹریٹس نے گزشتہ ایک ہفتے میں 88 ہزار سے زائد انسپکشنز مکمل کی ہیں جس کے نتیجے میں 55 لاکھ 66 ہزار روپے سے زائد جرمانے عائد کیے گئے۔ انہوں نے بتایا کہ گراں فروشی کے خلاف زیرو ٹالرنس ہے اور ناجائز منافع خوری، ذخیرہ اندوزی اور ملاوٹ پر کسی قسم کی رعایت نہیں دی جائے گی۔ڈاکٹر کرن خورشید نے مزید بتایا کہ منافع خوروں کے خلاف کریک ڈاؤن تیز کر دیا گیا ہے، اور گزشتہ ایک ہفتے کے دوران 433 افراد کو گرفتار کیا گیا جب کہ مہنگی روٹی فروخت کرنے والوں کے خلاف بھی سخت کارروائی عمل میں لائی گئی، جس کے نتیجے میں 138 افراد کو گرفتار اور 25 مقدمات درج کیے گئے روٹی کی گراں فروشی پر 10 لاکھ روپے سے زائد جرمانے بھی عائد کیے گئے۔سیکرٹری فوڈ سیفٹی ڈاکٹر کرن خورشید کا کہنا تھا کہ ریٹ لسٹ آویزاں نہ کرنے اور اوورچارجنگ پر ایک ہفتے میں 72 مقدمات درج کیے گئے، جبکہ مختلف قانونی خلاف ورزیوں پر 38 دکانیں اور مارکیٹس سیل کی گئیں اور 55 افراد کو گرفتار کیا گیا۔ڈاکٹر کرن خورشید نے بتایا کہ محکمہ فوڈ سیفٹی اینڈ کنزیومر پروٹیکشن شہریوں کو ملاوٹ سے پاک اور معیاری خوراک کی فراہمی کے لیے کوشاں ہے تاکہ عوام کو محفوظ اور سستی خوراک کی فراہمی یقینی بنائی جا سکے-انہوں نے بتایا کے ان اقدامات کا مقصد قانون پر عملدرآمد کروانا اور عوام کو حقیقی ریلیف فراہم کرنا ہے تاکہ ہر شہری مناسب قیمت پر معیاری اشیاء تک رسائی حاصل کر سکے۔